राजविराजमा बृहत् सरसफाई अभियान सुरू

राजविराज। राजविराज नगरपालिकाले विगत ६ दिनदेखि उठाउन नसकेको फोहोर आजदेखि उठाउने बृहत् सरसफाई अभियान सुरू गरेको छ ।

जेनजी आन्दोलनका क्रममा नगरपालिकाका फोहोर संकलन गर्ने टिपर र ट्र्याक्टर पूर्ण रूपमा क्षतिग्रस्त भएपछि शहरमा फोहोर समस्या गम्भीर बनेको थियो । नगर क्षेत्रमा फैलिएको दुर्गन्ध र स्वास्थ्य जोखिमलाई ध्यानमा राख्दै मंगलबारदेखि अभियान थालिएको नगरपालिकाले जनाएको छ ।

कार्यवाहक नगरप्रमुख ईसरत परविनको अगुवाईमा सुरू भएको सरसफाई अभियान अन्तर्गत नगरपालिकाको प्राङ्गण, अदालत रोड, सिरहा सडकखण्ड, नेता चोक, गजेन्द्र चोकलगायत स्थानमा फोहोर उठाइएकाे छ ।

अभियानमा नगरका जनप्रतिनिधि, सप्तरी युथ, उद्योग वाणिज्य संघ, कर्मचारी, सरसफाईकर्मी तथा स्थानीयवासीहरूको सक्रिय सहभागिता रहेको थियो ।

गत सोमबार कार्यवाहक नगरप्रमुख परविनको अध्यक्षतामा बसेको बैठकले आजदेखि विशेष सरसफाई अभियान सञ्चालन गर्ने निर्णय गरेको थियो ।