सप्तरीमा दुई उज्वेकिस्तानी महिला पक्राउ

राजविराज । सप्तरी जिल्लाको बलान बिहुल गाउँपालिका–४ स्थित बेल्ही–चन्ही सडकखण्डबाट प्रहरीले दुई जना विदेशी महिला पक्राउ गरेको छ । शनिबार राति उनीहरूलाई नियन्त्रणमा लिएको जिल्ला प्रहरी कार्यालय सप्तरीले जनाएको छ ।

पक्राउ पर्नेमा उज्वेकिस्तानको फेरगना निवासी ३९ वर्षीया सोखिस्ता अकबारोभा र हारेजीमकी निवासी ३९ वर्षीया फेरुजा याक्सिर्मुतोभा रहेका छन् । उनीहरू कसरी सप्तरीसम्म आइपुगे भन्ने विषयमा अहिले अनुसन्धान भइरहेको प्रहरीले जनाएको छ ।

सप्तरी प्रहरीका प्रवक्ता एवं डीएसपी जितेन्द्र कुमार बस्नेतका अनुसार प्रारम्भिक अनुसन्धानका क्रममा दुबै महिला काठमाडौं हुँदै आएको खुलेको छ । “पक्राउ परेकी महिलाले आफूहरूको पासपोर्ट र भिसा काठमाडौंको एक होटलमा रहेको बयान दिएका छन्,” डीएसपी बस्नेतले जानकारी दिए ।

पक्राउ परेका दुवैलाई थप अनुसन्धान तथा आवश्यक कारबाहीका लागि अध्यागमन विभाग पठाउने तयारी भइरहेको प्रहरीले जनाएको छ ।