राजविराजमा खानेपानी कार्यालयको लापरवाहीले सर्वसाधारणलाई सास्ती

राजविराज । सप्तरीको राजविराजस्थित राजविराज–हनुमाननगर सडक खण्ड अन्तर्गत स्वास्थ्य कार्यालय अगाडि खानेपानी कार्यालयको लापरवाहीका कारण सर्वसाधारणलाई सास्ती भएको छ ।

आइतवार खानेपानी संस्थान कार्यालयले धाराको पाइप जडान गर्न मुख्य सडक नै खनेर जोडेको थियो । तर काम सकिएपछि खाल्डो पुरै बन्द नगरी छाडिँदा यातायातका साधन सञ्चालनमा कठिनाइ भएको र सर्वसाधारणलाई आवतजावतमा समस्या परेको छ ।

बडा दशैं सुरु भइसकेको बेला सडकको मुख्य मार्गमै यसरी खाल्डो खनेर छाड्दा दुर्घटना हुने सम्भावना बढेको स्थानीय ललन झाले गुनासो गरे ।

यस्तै, राजविराज नगरपालिका मात्र नभई अन्य स्थानमा पनि खानेपानी संस्थान कार्यालयको लापरवाहीले धारा तथा पाइप जडान र मर्मतका नाममा सडक खनेर छाड्ने कार्य भइरहेकाले साना–ठूला दुर्घटनाको जोखिम बढेको स्थानीय सञ्चारकर्मी रामनारायण यादवले बताए ।

सडक विभागबाट अनुमति लिएर मात्र विकास कार्य गर्नुपर्नेमा त्यसको सट्टा विनाश गरिएको भन्दै जेनजी सप्तरीका संयोजक अमित यादवले यस्तो गतिविधिप्रति कडा आपत्ति जनाएका छन् । उनले यस विषयमा सम्बन्धित कार्यालयको ध्यानाकर्षण गराउने उनले बताए ।