नगर प्रमुख सिंहद्वारा कृषि तथा पशुपन्छी सेवा केन्द्र उद्घाटन

सप्तरी । सप्तरीको बोदेबरसाईन नगरपालिकामा आधुनिक सुविधासहितको कृषि तथा पशुपन्छी सेवा केन्द्र आफ्नै भवनबाट सञ्चालनमा आएको छ ।

बुधबार आयोजित कार्यक्रममा नगर प्रमुख आतेश कुमार सिंहले भवनको उद्घाटन गर्दै सेवा केन्द्र सञ्चालनमा ल्याए ।

नेपाल सरकारको कृषि तथा पशुपन्छी विकास मन्त्रालय अन्तर्गत ग्रामीण उद्यम तथा आर्थिक विकास आयोजना (आरईईडी परियोजना) आर्थिक करिडोर कार्यालय बर्दिवास, महोत्तरीमार्फत भवन निर्माण गरिएको हो । आर्थिक करिडोर कार्यालय प्रमुख राजेश साहले भवन हस्तान्तरण गर्दै नगर प्रमुख सिंहलाई जिम्मा दिएका थिए ।

करिब २ करोड ७५ लाख ८७ हजार ३६ रुपैयाँ २१ पैसाको लागतमा बनेको उक्त नवनिर्मित भवनको बारेमा जानकारी हरिनारायण साहले दिएका थिए ।

नगरपालिकाको पशु शाखा प्रमुख गिरिन्द्र यादवका अनुसार पहिले साँघुरो र चुहिने पुरानो भवनमा सेवा दिन असहज हुने गर्थ्यो । नयाँ सुविधा सम्पन्न भवनबाट किसानलाई सहज सेवा उपलब्ध हुने र माटो परीक्षण, बीउ उपचार, बाली उपचार लगायतका सेवा यहीँबाट पाइने व्यवस्था मिलाइएको छ ।

यसैगरी, वडा नं. ६ का अध्यक्ष राजकुमार यादवले अब किसानले सेवा लिन बाहिर धाउनुपर्ने बाध्यता हटेको बताए । उनले भने, “पहिले परीक्षणका लागि बाहिर जानुपर्थ्यो, जसले समय र पैसा दुवै खर्चिनुपर्थ्यो। तर अहिले नगरपालिकामै सुविधा उपलब्ध भएपछि स्थानीय कृषकलाई ठूलो राहत भएको छ ।”

कार्यक्रम राजेश साहको अध्यक्षतामा सम्पन्न भएको थियो। कार्यक्रममा नगर उपप्रमुख रेणु कुमारी साह, वडा अध्यक्षहरू राजकुमार यादव, शिव नारायण यादव, किरण साह, रबिन्द्र कुमार साह, बैजनाथ चौधरी, सुनित कुमार यादव, मो. मोजिबुर रहमान, स्थानीय कर्मचारी, समाजसेवी तथा सरोकारवाला नागरिकहरूको उपस्थिति रहेको थियो ।