दशैंको अवसरमा मालपोत कार्यालय राजबिराजको विशेष सम्मान कार्यक्रम

राजविराज । मालपोत कार्यालय सप्तरीले वडा दशैँ तथा जेनजी आन्दोलनका क्रममा कार्यालयलाई सम्भावित क्षतिबाट जोगाउन योगदान पुर्‍याएका विभिन्न व्यक्तिहरूलाई सम्मान गरेको छ ।

बिहीबार मालपोत कार्यालय राजबिराजको सभाहलमा आयोजित कार्यक्रममा वडा दशैँको शुभकामना आदान–प्रदानसँगै जेनजी आन्दोलनमा शहीद भएकाप्रति श्रद्धाञ्जली अर्पण गरिएको थियो । सो अवसरमा कार्यालयलाई सहयोग पु-याउने व्यक्तिहरूलाई धन्यवाद ज्ञापन गर्दै सम्मान गरिएको हो ।

जेनजी आन्दोलनका क्रममा सप्तरीवासीको भूमिसम्बन्धी कागजात, अभिलेख र भौतिक सम्पत्ति सुरक्षित राख्न योगदान पु-याएको कदरस्वरूप लेखापढी कानुन व्यवसायी इकाई अध्यक्ष श्रीलाल यादवलाई मालपोत अधिकृत अजय झाले सम्मान गरे ।

त्यसैगरी पत्रकारितामार्फत कार्यालयलाई क्षति हुन नदिने भूमिका निर्वाह गरेको भन्दै मेमो खबर अनलाइनका सम्पादक चन्दनकुमार यादवलाई समेत सम्मान गरिएको छ ।

यस्तै, मालपोत कार्यालयका खरिदार बैजु देव, भागवत यादव, कर्मचारी पवन कुमार मेहतर र विनोद यादवलाई पनि कार्यालय जोगाउन पु-याएको भूमिकाका लागि सम्मान गरिएको थियो ।

कार्यक्रममा मालपोत अधिकृत अजय झाले जेनजी आन्दोलनले जनताको केही महत्वपूर्ण माग सम्बोधन भएको उल्लेख गर्दै प्राप्त उपलब्धीलाई अनुशासित ढंगले संरक्षण गर्नुपर्ने आवश्यकता औंल्याए। उनले आन्दोलनका क्रममा ज्यान गुमाएका प्रति श्रद्धाञ्जली अर्पण गर्दै घाइतेहरूको शीघ्र स्वास्थ्य लाभको कामना गरे।

लेखापढी कानुन व्यवसायी संघका केन्द्रीय सदस्य जय नारायण देवले जिल्लाभरका पालिकामा रहेका जनताको कागजात सुरक्षित राख्ने प्रयास सराहनीय भएको बताए । उनले सेवाग्राहीका कामलाई अझ छिटो र सरल बनाउन आग्रह पनि गरे ।

मालपोत अधिकृत अजय झाको अध्यक्षतामा भएको कार्यक्रममा कार्यालयका कर्मचारी तथा लेखापढी व्यवसायीहरूको उपस्थिति रहेको थियो। कार्यक्रम सञ्चालन अपरेट सोवन परियारले गरेका थिए ।