राजविराज नगरपालिकाले वडास्तरिय योजना छनोट सम्पन्न

राजविराज । राजविराज नगरपालिकाले नगरका वडाहरूमा वडास्तरिय योजना छनोट भेला सम्पन्न गरेको छ ।

बिहीबार वडा नं. २ का विभिन्न बस्ती र टोलका स्थानीयहरूको भेलामा वडा अध्यक्ष अरुण यादवले आर्थिक वर्ष २०८२/८३ का लागि प्रस्तावित ५१ लाख बराबरको बजेट, नीति तथा कार्यक्रम सार्वजनिक गरेका थिए ।

सो अवसरमा अध्यक्ष यादवले स्थानीयहरूले अघि सारेका अधुरा योजनालाई प्राथमिकतामा राख्ने निर्णय गरिएको जानकारी दिए। वडा भेलाबाट राजदेवी पोखरी महाड वरिपरि बाटो निर्माण तथा पोखरीको सौन्दर्यीकरणका लागि बजेट विनियोजन गर्ने निर्णय भएको छ ।

त्यसैगरी, तेतरीगाछी चोकमा सार्वजनिक शौचालय निर्माण गर्न बजेट छुट्याउने, सहिद आनन्द साहको घर जोड्ने बाटो निर्माण गर्ने, सञ्चारकर्मी शैलेन्द्र सिंहको घरदेखि पत्रकार जितु झा सम्मको बाटो निर्माण लगायतका अधुरा योजना सम्पन्न गर्न पनि बजेट छुट्याउने निर्णय भएको छ ।

कार्यक्रममा नेपाली कांग्रेस वडा नं. २ का बूथ कमिटी अध्यक्ष इन्द्र कुमार देव, वडा सदस्य बिहारी साह, आशा झा, राजुद्दीन खान, सञ्चारकर्मी चन्दनकुमार यादव, जसपा नेपाल सप्तरी कार्यसमिति सदस्य महबुब आलम, समाजसेवी सूर्य नारायण यादव, शैलेन्द्र सिंह, देव नारायण यादव, मोहम्मद सतार, अवकाशप्राप्त सर्वेक्षक चन्द्र नारायण यादव लगायतले आफ्नो धारणा राखेका थिए ।

भेलामा वडा सदस्य राजुद्दीन खान, आशा झा, मञ्जु रजक, स्थानीय समिम अहमद, मनोज सिंह, समाजसेवी देव नारायण यादव ‘कारी’, सुनिल सिंह लगायतको उपस्थिति थियो ।

यसैगरी, बुधबार वडा नं. ८ मा पनि वडा अध्यक्ष जय नारायण मण्डलको अध्यक्षतामा वडास्तरिय योजना छनोट भेला सम्पन्न गरिएको छ। सो भेलाबाट पनि आव २०८२/८३ का लागि ५१ लाख बराबरको बजेट, नीति तथा कार्यक्रम सार्वजनिक गरिएको छ ।

राजविराज नगरपालिकाले वडा नं. १ देखि १६ सम्म वडास्तरिय भेला गरी योजना तर्जुमा गर्न आग्रह गरेको छ। साथै, आर्थिक वर्ष २०८२/८३ को लागि नगरपालिकाको नवौं अधिवेशन तथा नगर सभा असोज १० गते गर्ने निर्णय गरेको छ ।