कोशी व्यारेजमा उच्च सतर्कता: बहाव ५.१० लाख क्युसेक, पुलमा आवागमन बन्द

सप्तरी । सप्तकोशीमा पानीको बहाव खतराको तह नाघेपछि आसपासका बस्तीहरू उच्च जोखिममा परेका छन् ।

आज (आइतबार)  बिहान ११ बजे मापन गर्दा सप्तकोशी नदीमा ५ लाख १० हजार ९६० क्युसेक प्रति सेकेन्ड बहाव पुगेको हो, जुन खतराको संकेत हो ।

स्थिति गम्भीर बन्दै गएपछि कोशी व्यारेजका ५६ वटै ढोका खोलिएका छन् । साथै, कोशी व्यारेज पुल भएर हुने आवतजावत पूर्ण रूपमा रोकिएको छ ।

जल तथा मौसम विज्ञान विभागको बाढी पूर्वानुमान महाशाखा अनुसार सप्तरीसँगै उदयपुर र सुनसरीका नदी तटीय क्षेत्रहरूमा उच्च जोखिम रहेको छ । स्थानीय बासिन्दालाई सजग रहन तथा आवश्यक परे सुरक्षित स्थानमा सारिन आग्रह गरिएको छ ।