अविरल वर्षाले डुबानमा परेका बोचही बस्तीका २० जनाको नेपाली सेनाद्वारा उद्धार

राजविराज । दुई दिनदेखि लगातार परेको अविरल वर्षाका कारण सप्तरीको सप्तकोशी नगरपालिका–६ स्थित  बोचही पोखरिया बस्ती डुबानमा परेको छ । सोही बस्तीमा फसेका सर्वसाधारणको नेपाली सेनाले उद्धार गरेको छ ।

श्री बरख गणको सुरक्षा बेस क्याम्प सप्तकोशी नगरपालिका–११ भगनीबाट खटिएको टोलीले सहायक सेनानी सुकमन तामाङको नेतृत्वमा बाढीमा फसेका वृद्ध, अशक्त, महिला र बालबालिकालाई सुरक्षित स्थानमा स्थानान्तरण गरेको बरख गण प्रमुख सेनानी शोवित बहादुर चन्दले जानकारी दिए ।

लगातारको वर्षाले  बोचही बस्तीमा पानी पस्दा ४० घरधुरी प्रभावित भएका थिए। तीमध्ये २० जनाको नेपाली सेनाले सकुशल उद्धार गरेको हो । उद्धार गरिएका सबै प्रभावित परिवारलाई राष्ट्रिय आधारभूत विद्यालयमा सुरक्षित रूपमा स्थानान्तरण गरिएको छ ।

देशभर भइरहेको अविरल वर्षाका कारण बाढी र पहिरो प्रभावित क्षेत्रमा नेपाली सेना आवश्यक जनशक्ति र सामग्रीसहित परिचालन गरिएको सैनिक जनसम्पर्क तथा सूचना निर्देशनालयले जनाएको छ ।

सेनाले पहिरोमा हराएका व्यक्तिको खोजी, डुबानमा परेकाको उद्धार, राजमार्गबाट पहिरो हटाउने, नदीले कटान गरेको क्षेत्रको संरक्षण तथा तटबन्ध निर्माणमा समेत सक्रिय भूमिका निभाइरहेको जनाएको छ ।

बोचनी क्षेत्रमा बाढीको जोखिम बढेपछि प्रमुख जिल्ला अधिकारी टुवराज पोखरेलको समन्वयमा नेपाली सेना, सशस्त्र प्रहरी बल र नेपाल प्रहरीले संयुक्त रूपमा उद्धार कार्य सञ्चालन गरेका हुन् ।