राजबिराज–२ मा निर्माण गरिएको संरचना भत्काइयो

राजबिराज । राजविराज नगरपालिका–२ गुलाब ग्यारेज अगाडिको सार्वजनिक जग्गामा मोहर्रम दाहा मेलाका लागि निर्माण गरिएको संरचना भत्काइएको छ ।

सो विषयमा मंगलबार जिल्ला प्रशासन कार्यालय सप्तरीका प्रमुख जिल्ला अधिकारी टुवराज पोखरेलको अध्यक्षतामा भएको छलफलमा सार्वजनिक जग्गामा निर्माण गरिएको उक्त संरचना हटाउने निर्णय भएपछि राजविराज नगरपालिकाले आज (बुधबार) संरचना भत्काएको हो ।

नगर प्रमुख ईसरत परविन र दुबै समुदायका प्रतिनिधिहरूको उपस्थितिमा अनधिकृत रूपमा निर्माण गरिएको संरचना सार्वजनिक जग्गाबाट हटाइएको जिल्ला प्रशासन कार्यालयले जनाएको छ ।

यसअघि प्रमुख जिल्ला अधिकारी टुवराज पोखरेलको नेतृत्वमा बसेको सर्वदलीय संयुक्त बैठकले उक्त स्थानमा कुनै पनि समुदायले कुनै पर्व, मेला वा धार्मिक कार्यक्रम आयोजना नगर्ने र झण्डा राख्न नपाउने निर्णय गरेको थियो ।

उक्त सार्वजनिक जग्गामा मुस्लिम समुदायले परम्परागत रूपमा मोहर्रमको दाहा मेला आयोजना गर्दै आएका थिए। तर पछिल्लो समय एक पक्षले झण्डा हटाउने र अर्को पक्षले जोगाउने प्रयास गर्दा दुई समूहबीच सामान्य झडप समेत भएको थियो ।

गत ०८२ असार २० गते तत्कालीन प्रमुख जिल्ला अधिकारी भोला दहालको उपस्थितिमा दुबै पक्षबीचको छलफलपछि संरचना हटाउने निर्णय गरिएको भए पनि कार्यान्वयन नहुँदा विवाद दोहोरिएको थियो ।