रूपनीमा भीषण आगलागी, ५० लाखभन्दा बढीको क्षति, एक जना घाइते

राजविराज । सप्तरीको रूपनी गाउँपालिका–१ रूपनी बजारमा बिहीबार राति भएको भीषण आगलागीमा करिब ५० लाख रुपैयाँभन्दा बढीको सम्पत्ति जलेर नष्ट भएको छ भने एक जना घाइते भएका छन् ।

इलाका प्रहरी कार्यालय रूपनीका अनुसार ललित यादवको घरमा विद्युत् मिटरको तार सर्ट भएर आगलागी भएको हो। आगो तीव्र गतिमा फैलिँदा यादवसहित अन्य छिमेकी परिवारका घरहरूमा समेत आगो सल्किएको थियो। घरभित्रका लत्ताकपडा, अन्नपात, भाँडाकुँडा, सुनचाँदीका गहना र चौपाया समेत जलेर नष्ट भएका छन् ।

आगो निभाउने क्रममा स्थानीय श्यामसुन्दर यादव घाइते भएका छन्। उनको ढाड र हातमा चोट लागेको छ । घाइते यादवलाई उपचारका लागि मधेश प्रदेश प्रहरी अस्पताल रूपनीमा लगिएको र उनको अवस्था सामान्य रहेको प्रहरीले जनाएको छ ।

आगलागी नियन्त्रणमा ल्याउन नेपाली सेना, नेपाल प्रहरी, सशस्त्र प्रहरी बल र कंचनरुप नगरपालिकाको दमकलसहित स्थानीय बासिन्दाको सहयोग लिइएको थियो । लामो प्रयासपछि आगो पूर्णरूपमा नियन्त्रणमा लिन सकिएको हो ।

आगलागीबाट ललित यादवको टिनको छानो भएका दुई घर जलेका छन्। साथै १ तोला सुन, १० तोला चाँदी, अन्नपात, लत्ताकपडा, भाँडाकुँडा, एक भैंसी, एक गाई, दुईवटा खसी र एकवटा बाख्रा जलेका छन्। यस्तै सुनिल यादवको टिनको छानो भएका दुई घर, ३ तोला सुन, ५० तोला चाँदी, नगद तीन लाख रुपैयाँ, अन्नपात, भाँडाकुँडा, लत्ताकपडा, परालको कुन्यु र एक भैंसी जलेका छन् ।

त्यस्तै श्यामसुन्दर यादवको टिनको छानो भएका दुई घर, ३ तोला सुन, ५० तोला चाँदी, नगद दुई लाख रुपैयाँ, अन्नपात, भाँडाकुँडा, लत्ताकपडा र भैंसी जलेर क्षति भएको छ । पार्वती देवी यादव (हाल ललित यादवको घरमा बस्दै आएकी) की तीन तोला सुन, सय तोला चाँदी र लत्ताकपडा समेत जलेर नष्ट भएका छन् ।

इलाका प्रहरी कार्यालय रूपनीका अनुसार आगलागीबाट कुल करिब ५० लाख ३० हजार रुपैयाँ बराबरको क्षति भएको प्रारम्भिक अनुमान गरिएको छ । आगलागीको कारण र क्षतिको थप विवरणबारे अनुसन्धान भइरहेको प्रहरीले जनाएको छ ।