अकुवा ब्राण्डको पानीमा फोहोर देखियो, उपभोक्ताको स्वास्थ्य जोखिममा

राजविराज । विरेन्द्र एण्ड सन्स फुड एण्ड बेभरेज इन्डस्ट्रीज शंभुनाथ नगरपालिका–५, मोहनपुरमा उत्पादन हुने ‘अकुवा’ ब्राण्डको पानीमा फोहोर देखिएपछि उपभोक्ताहरूमा चिन्ता बढेको छ ।

सर्वसाधारण उपभोक्ताले बोतलको पानीमा स्पष्ट रूपमा फोहोरका कणहरू भेटिएको भन्दै यसलाई गम्भीर लापरबाहीको संज्ञा दिएका छन् ।

स्थानीय एक उपभोक्ता भन्छन्, “हामीले सफा र स्वास्थ्यप्रद पिउने पानीको आशामा बोतलबन्द पानी किन्छौं, तर बोतलभित्रै फोहोर देखिनु अत्यन्तै चिन्ताजनक र गम्भीर लापरबाही हो।” यस्तै प्रकारका गुनासा धेरै उपभोक्ताबाट पनि उठिरहेका छन् । पानीको गुणस्तरप्रति आशंका उत्पन्न भएपछि धेरैले अकुवा ब्राण्डको पानी उपभोग नगर्न सबैलाई सचेत गराएका छन् ।

यस घटनाले खानेपानी उत्पादन गर्ने कम्पनीहरूको नियमन तथा गुणस्तर परीक्षणमा सरकारी संयन्त्र कत्तिको प्रभावकारी छ भन्ने प्रश्नसमेत उठाएको छ। उपभोक्ता तथा नागरिक अभियन्ताहरूले सरोकारवाला निकायलाई तत्काल अनुगमन गरी दोषी कम्पनीमाथि कडा कारबाही गर्न माग गरेका छन् ।

स्थानीय जनप्रतिनिधिहरू भन्छन्, “जनस्वास्थ्यको सवालमा कुनै पनि प्रकारको सम्झौता स्वीकार्य छैन । यस्ता गैरजिम्मेवार कार्य गर्ने कम्पनीहरूलाई कानुनी दायरामा ल्याई आवश्यक कारबाही गर्नु अपरिहार्य छ ।”

अकुवा ब्राण्डको पानी विभिन्न विद्यालय, अस्पताल, होटल तथा सर्वसाधारण उपभोगकर्ताबीच प्रयोग हुँदै आएको छ । यस्ता  गुणस्तरहीन पानीको आपूर्ति हुनु स्वास्थ्यसम्बन्धी गम्भीर जोखिम भएको भन्दै उपभोक्ताहरूले सम्बन्धित निकायको  ध्यानाकर्षण गराएका छन् ।