राजविराज । नेपाल पत्रकार महासंघका केन्द्रीय परिषद् सदस्य मनोजकुमार माझीमाथि समाचार संकलनका क्रममा भएको हातपात र दुर्व्यवहारप्रति नेपाल पत्रकार महासंघ, शाखा सप्तरीले कडा निन्दा व्यक्त गर्दै दोषीमाथि कानुनी कारबाहीको माग गरेको छ ।
मंगलबार महासंघ शाखाका अध्यक्ष श्रावण कुमार देवद्वारा जारी प्रेस विज्ञप्तिमा असोज २७ गते शम्भुनाथ नगरपालिका–११ मा अदालतको आदेशअनुसार घेराबेरा लगाउने कार्यको समाचार संकलनका क्रममा पत्रकार माझीमाथि स्थानीय केही व्यक्तिले आक्रमण गरेको घटनाप्रति गम्भीर ध्यानाकर्षण गरिएको उल्लेख छ ।
विज्ञप्तिमा भनिएको छ, “दिनरात नभनी जनतालाई सूचना पुर्याउने कार्यमा खटिने पत्रकारलाई रिपोर्टिङकै क्रममा भएको आक्रमणले मुलुकमा अराजकता मौलाउँदै गएको संकेत गर्छ ।”
महासंघले आक्रमणमा संलग्न व्यक्तिको पहिचान भइसकेको र जिल्ला प्रहरी कार्यालयमा जाहेरी दर्ता भइसकेको जानकारी दिँदै दोषीलाई तत्काल पक्राउ गरी कानुनी कारबाही गर्न जोडदार माग गरेको छ । साथै, पत्रकारिताका लागि सुरक्षित वातावरण सुनिश्चित गर्न स्थानीय प्रशासन, राजनीतिक दल, नागरिक समाजलगायत सबै पक्षलाई गम्भीर पहल गर्न आग्रह गरिएको छ ।
घटनाका प्रत्यक्षदर्शीहरूका अनुसार पत्रकार माझीमाथि शम्भुनाथ नगरपालिका–११ का राजा कुमार साहको नेतृत्वमा २५–३० जनाको समूहले आक्रमण गरेका थिए। उनीहरूले समाचार संकलन गरिरहेकै क्रममा माझीको मोबाइल खोसेर सडकमा लडाएका थिए भने प्रेस कार्ड नियन्त्रणमा लिएर च्यातिदिएका थिए ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |