छठ विशेष सफाइ : राजविराजका सार्वजनिक पोखरीमा सेना र युवाको हातेमालो

राजविराज । छठ पर्व नजिकिँदै गर्दा राजविराज तथा वरपरका क्षेत्रहरूमा नदी तथा पोखरीहरूको सरसफाइ अभियान सुरु गरिएको छ । अभियानअन्तर्गत बुधबार राजविराज–५ स्थित सरस्वती टोलको पोखरीको सरसफाइ गरिएको छ ।

उक्त सरसफाइ कार्यमा बरख गणअन्तर्गतको नेपाली सेनाको टोली, राजविराज वडा नं. ५ का अध्यक्ष बन्दुलाल दास, युवा नेता लक्ष्मण यादव, वडा सदस्य सन्तोष मण्डल, स्थानीय अगुवा पार्थो सरकार, तुलानाथ माझी, सप्तरी युथका विष्णु यादव र मोहन यादवसहित स्थानीय बासिन्दाहरूको उल्लेखनीय सहभागिता रहेको थियो ।

यसैक्रममा राजविराजका कल्टुदास, भगवती, झल्ही, राजदेवी, अरसाही लगायतका पोखरीहरूको समेत सरसफाइ थालिएको छ ।

नेपाली सेना, नेपाल प्रहरी, सशस्त्र प्रहरीको सहयोगमा स्थानीय टोल विकास संस्था र छठ पूजा व्यवस्थापन समितिहरूको समन्वयमा सार्वजनिक पोखरी तथा नदीहरूको सरसफाइ कार्य भइरहेको छ ।

धेरैजसो पोखरी वर्षभर सरसफाइ नहुँदा झारले भरिएको वा फोहोरको थुप्रोका कारण दुर्गन्धित बनेका छन् । यस्ता पोखरीहरूलाई छठ पर्वलाई लक्षित गर्दै सफा गरिँदैछ ।

छठ पर्वमा अस्ताउने र उदाउने सूर्यको पूजा पोखरी वा नदी किनारमै गर्ने परम्परा रहेकोले पोखरीहरूको सरसफाइलाई विशेष महत्व दिइएको हो । पर्वको अवसरमा नदी तथा पोखरी किनारहरूमा टेन्ट गाडेर, रंगीचंगी बत्तीहरूबाट सजाएर आकर्षक बनाइने परम्परा छ ।

सप्तरी युथका अभियन्ता विष्णु यादवले छठ पर्वलाई ध्यानमा राख्दै सार्वजनिक पोखरीहरूको सरसफाइ अभियान सुरु गरिएको जानकारी दिए । “दीपावली र छठमा हामी घरको सरसफाइ गर्छौं, अब घर मात्र होइन, टोल पनि सफा राख्नुपर्छ भन्ने सन्देशसहित हामी अघि बढेका छौं,” उनले भने । “सार्वजनिक सम्पत्तिको संरक्षण र सरसफाइमा स्थानीय बासिन्दालाई जागरुक बनाउन हामी सरोकारवाला निकायहरूसँग सहकार्य गर्दैछौं ।”

उनी अनुसार नेपाली सेना र सशस्त्र प्रहरीको सहयोगमा भगवती र कल्टुदास पोखरीको सरसफाइ सम्पन्न भइसकेको छ। विगत १० दिनदेखि स्थानीय सामाजिक अभियन्ताहरूले विभिन्न पोखरीहरूको सरसफाइ गरिरहेका छन् ।

सप्तरी युथका मोहन यादव, विष्णु यादव लगायत युवाहरूको सक्रियतामा भगवती, कल्टुदास, सरस्वती, राजदेवी र झल्ही पोखरीको नियमित सरसफाइ भइरहेको छ ।

“नगरका विभिन्न स्थानमा पोखरी सरसफाइका लागि स्थानीय बासिन्दाले अपेक्षित चासो नदेखाए पनि हामी निरन्तर सक्रिय छौं,” विष्णु यादवले बताए । “छठलाई तराईका समुदायले अत्यन्तै महत्वपूर्ण पर्वका रूपमा मनाउँछन् । आम नागरिकले शान्तिपूर्ण र मर्यादित रूपमा पर्व मनाउन सकून् भन्ने उद्देश्यले हामीले यो अभियान चलाएका हौं ।”

उनका अनुसार स्थानीय प्रशासनले जनशक्ति परिचालन गरेर पनि महत्वपूर्ण पोखरीहरूको सरसफाइ कार्यलाई सहयोग पुर्‍याइरहेको छ ।