यादब सेवा समितिको साधारण सभामा जनप्रतिनिधिदेखि पत्रकारसम्म सम्मानित

राजबिराज । राजबिराजस्थित यादब सेवा समिति केन्द्रीय कार्यालयले गोवर्धन पूजाको अवसरमा २९औं वार्षिक साधारण सभाको आयोजना गर्दै विभिन्न क्षेत्रमा योगदान पु-याएका दर्जनौं व्यक्तिहरूलाई सम्मान गरेको छ ।

बुधबार राजबिराज वडा नम्बर ९ स्थित राधाकृष्ण मन्दिरको सभाहलमा आयोजित कार्यक्रममा समाजमा पुर्‍याइएको योगदानको उच्च कदर गर्दै मधेश प्रदेशसभा सदस्य अनिरुद्ध प्रसाद सिंह यादव, विभिन्न पालिकाका उपप्रमुखहरू, शिक्षक, पत्रकार, अधिवक्ता तथा समाजसेवीहरूलाई दोसल्ला र कदरपत्रद्वारा सम्मान गरिएको थियो ।

कार्यक्रममा यादब सेवा समितिका अध्यक्ष गंगाराम यादवले सम्मानित व्यक्तिहरूलाई दोसल्ला ओढाई सम्मान पत्र प्रदान गरेका थिए । सम्मानित हुनेहरूमा जिल्ला समन्वय समितिका उपप्रमुख शंभु प्रसाद यादव, डाक्नेश्वरी नगरपालिकाकी उपप्रमुख मीरा कुमारी यादव, बिष्णुपुर गाउँपालिकाकी उपाध्यक्ष रेनु यादव, महादेवा गाउँपालिकाकी अध्यक्ष अर्चना यादव, छिन्मस्ता गाउँपालिकाकी राजुदेवी यादव, तिरहुत गाउँपालिकाकी बिना यादव, बलान–बिहुल गाउँपालिकाकी उपाध्यक्ष रेनु यादव तथा हनुमाननगर–कंकालनी नगरपालिकाकी उपप्रमुख सरिता देवी यादव (सिपलिया) रहेका थिए ।

पत्रकारिता क्षेत्रमा योगदान पु-याउने व्यक्तिहरूमध्ये सप्तरी टाइम्स तथा मेमो खबर अनलाइनका सम्पादक चन्दनकुमार यादवलाई दोसल्ला र कदरपत्रद्वारा सम्मान गरिएको थियो । शिक्षा तथा बृद्विजीवी क्षेत्रमा डा. कालिप्रसाद यादव, डा. सत्यनारायण यादव, अवकाशप्राप्त शिक्षक नागेन्द्रप्रसाद यादव तथा शिक्षक महासंघका प्रदेश अध्यक्ष परशुराम यादवलाई सम्मान गरिएको थियो । त्यस्तै समाजसेवी तर्फ छिन्मस्ता डायरी उद्योगका सञ्चालक सुरेन्द्रप्रसाद शर्मा, कथावाचक पण्डित शास्त्री रामकृष्ण यादव, मैथिली गायक सोनु कुमार, केशव कर्ण तथा न्यु अफसेट प्रेसका बालेश्वर यादव सम्मानित भएका थिए ।

कानुनी क्षेत्रमा अधिवक्ता तथा पुनरावेदन बार एशोसिएसन इकाई अध्यक्ष हरेराम यादव, लेखापढी कानुन व्यवसायी इकाई अध्यक्ष श्रीलाल यादव, सचिव बद्रीनारायण यादव, बसन्त यादव र सुदीप यादवलाई सम्मान गरिएको थियो। त्यस्तै मन्दिरका महिला मण्डली तर्फ मिना वर्मा र चन्देश्वरी देवी यादवलाई पनि सम्मान प्रदान गरिएको थियो ।

कार्यक्रममा मधेश प्रदेशसभा सदस्य अनिरुद्ध प्रसाद सिंह यादवले यादब समुदायभित्र देखिएका विकृति र कुरीतिहरू अन्त्य गरी समाजको विकास र उत्थानमा सबैले मिलेर काम गर्नुपर्नेमा जोड दिए। उनले बालबालिका तथा युवाहरूमाथि कुलतको असर बढ्दै गएको भन्दै चेतनामूलक कार्यक्रम सञ्चालन गर्न समितिलाई आग्रह गरे ।

पूर्वमन्त्री तथा संविधानसभा सदस्य उमेश यादवले यादब समुदायले देशका आन्दोलन र अधिकार प्राप्तिमा ऐतिहासिक भूमिका खेलेको स्मरण गर्दै, आजका युवाहरू गलत गतिविधि र कुलतमा फसेकोले सुधारका लागि समितिले अग्रणी भूमिका लिनुपर्नेमा जोड दिए। रूपनी गाउँपालिका अध्यक्ष दिनेश यादवले सप्तरीमा यादब समुदायको ऐतिहासिक पहिचान हराउँदै गएको भन्दै यसको संरक्षण, संवर्द्धन र उत्थानका लागि समितिले ठोस कदम चाल्नुपर्ने धारणा राखे ।

डाक्नेश्वरी नगरपालिकाकी उपप्रमुख मीरा यादवले महिलाको हक, हित र अधिकार सुनिश्चितताका लागि समितिले अझ प्रभावकारी भूमिका खेल्नुपर्ने बताइन् । त्यस्तै महादेवा गाउँपालिकाकी उपाध्यक्ष अर्चना यादवले बालबालिका गलत बाटोतर्फ आकर्षित हुँदै गएको भन्दै अभिभावक र समितिले संयुक्त रूपमा सचेतना कार्यक्रम सञ्चालन गर्नुपर्ने आवश्यकता औंल्याइन् ।

यादब सेवा समितिका अध्यक्ष गंगाराम यादवको अध्यक्षतामा सम्पन्न सभामा पूर्वमन्त्री उमेश यादव, प्रदेशसभा सदस्य अनिरुद्ध यादव, जिल्ला समन्वय इकाई उपप्रमुख शंभु यादव, समितिका पूर्व महासचिव अशोक यादव, संयोजक मुसहर यादव, पूर्वअध्यक्ष भीमराज यादव, शिक्षक परशुराम यादव, अधिवक्ता हरेराम यादव, श्रीलाल यादव, पण्डित शास्त्री रामकृष्ण यादव र समाजसेवी रामदेव यादवलगायतले समाज विकास र विकृति अन्त्यका लागि समितिको भूमिकाबारे आ–आफ्नो धारणा राखेका थिए ।

उक्त अवसरमा महासचिव महेन्द्र प्रसाद यादवले आर्थिक वर्ष २०८१/८२ मा सम्पन्न भएका गतिविधिहरूको प्रतिवेदन प्रस्तुत गरेका थिए भने कार्यक्रम महासचिव यादवकै सञ्चालनमा सम्पन्न भएको थियो। कार्यक्रममा सचिव ब्रह्मदेव यादवले स्वागत मन्तव्य दिएका थिए ।