चन्दन यादब 
राजविराज । सप्तरीको अग्नीसाइर कृष्णासवरन गाउँपालिकाका अध्यक्ष दिनानाथ चौधरीले आफूले राजीनामा नदिएको दाबी गरेका छन् ।
बुधबार जनडोल स्थित सम्पर्क कार्यालयमा पत्रकार सम्मेलन गरी अध्यक्ष चौधरीले आफू बिरामी अवस्थामा रहेका बेला वडा नं. ४ का अध्यक्ष तेजनारायण यादवले आफूलाई झुक्याएर विभिन्न कागजातहरूमा हस्ताक्षर गराएको आरोप लगाए। ती कागजातहरूमध्ये राजीनामा पत्र पनि पर्न सक्ने उनले आशंका व्यक्त गरे ।
अध्यक्ष चौधरीले राजीनामा पत्रमा रहेको हस्ताक्षर आफ्नो नभएको स्पष्ट दाबी गर्दै यो राजनीतिक प्रतिशोधका लागि गरिएको षड्यन्त्र भएको आरोप लगाए। “मलाई फसाउन र पदच्युत गर्न नक्कली राजीनामा तयार गरी मेरो हस्ताक्षर नक्कलीरूपमा राखिएको हो,” उनले भने ।
उनका अनुसार गाउँपालिकामा प्रमुख प्रशासकीय अधिकृत (प्रमुख प्रशा.अ.) रमेशकुमार चौधरी ८४ दिनसम्म अनुपस्थित रहेकाले आफूले उनलाई हाजिर गर्न अस्वीकार गरेका थिए । यसपछि उनीहरूबाट दवाव आउन थालेको र अन्ततः बदलाको भावनाले यस्तो जालसाजी गरिएको उनले आरोप लगाए ।
प्रमुख प्रशा.अ. चौधरीले शारीरिक असक्षमता हुँदाहुँदै पनि हाजिर हुन खोज्दा मन्त्रालयले पठाएको पत्रमा चलानी नम्बर नमिलेको र लामो अनुपस्थितिको कारण हाजिर अस्वीकार गरिएको अध्यक्ष चौधरीको भनाइ छ ।
उता, उपाध्यक्ष कल्पना कुमारी चौधरीले भने अध्यक्ष दिनानाथ चौधरीले असोज ५ गते दिएको लिखित राजीनामा गाउँपालिकाको मंगलबार बसेको कार्यपालिका बैठकबाट स्वीकृत गरिएको बताएकी छन् ।
उनका अनुसार बैठकमा बहुमतले राजीनामा स्वीकृत गर्ने निर्णय भएपछि आफूले अध्यक्षको राजीनामा स्वीकार गरेकी हुन् । संविधानको धारा २१५(८)(क) बमोजिम मंगलबारबाट राजीनामा लागू हुने गरी स्वीकृत गरिएको उनको भनाइ छ ।
राजीनामा स्वीकृत भएको जानकारी निर्वाचन आयोग नेपाल, कान्तिपथ, काठमाडौं पठाइएको छ। साथै कानुन, न्याय तथा संसदीय मामिला मन्त्रालय; मुख्यमन्त्री तथा मन्त्रिपरिषद् कार्यालय (मधेस प्रदेश); जिल्ला समन्वय समिति सप्तरी; जिल्ला प्रशासन कार्यालय सप्तरी; जिल्ला निर्वाचन कार्यालय सप्तरी; कोष तथा लेखा नियन्त्रक कार्यालय सप्तरी र गाउँपालिकाका प्रमुख प्रशासकीय अधिकृतलाई समेत बोधार्थ पठाइएको उपाध्यक्ष चौधरीले जानकारी दिइन् ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |