Memo Khabar 
राजविराज । राजविराजमा जारी इन्टर हब जिल्ला स्तरीय टी–ट्वान्टी महिला क्रिकेट प्रतियोगिता अन्तर्गत सोमबार भएका खेलमा सिरहा र मोरङ विजयी भएका छन् ।
पविमावि क्रिकेट मैदानमा सम्पन्न पहिलो खेलमा सिरहाले सप्तरीलाई ३ रनले पराजित गर्दै विजयी सुरुवात गरेको छ भने मोरङले धनुषालाई ९ विकेटले हराएको हो ।
टस जितेपछि सप्तरीले सिरहालाई पहिले ब्याटिङको निम्तो दियो । सिरहाले निर्धारित १५ ओभरमा ८ विकेट गुमाएर ८० रनको योगफल तयार पार्यो । टीमका लागि आरती चौधरीले २० रन र सरस्वती चौधरीले १८ रन योगदान गरिन् । बलिङतर्फ सप्तरीकी सुस्मिता यादव र सचिता यादवले समान २र२ विकेट तथा विदिया रामले १ विकेट हात पारिन् ।
जवाफमा सप्तरीले निर्धारित १५ ओभरमा ८ विकेट गुमाएर ७७ रन मात्रै बनाउन सक्यो । टिमका लागि बन्दना रजकले २३ रन, सचिताले १२ रन र साक्षी देवले ११ रन जोडे। बलिङतर्फ सिरहाकी सरस्वती चौधरी र अनुराधा चौधरीले समान ३र३ विकेट र अनु यादवले १ विकेट लिइन् ।
खेलकी ‘प्लेयर अफ द म्याच’ सिरहाकी सरस्वती चौधरी घोषित भइन्, सबल नेपालका कार्यक्रम संयोजक रोशन मण्डलले जानकारी दिए।
टस जितेर धनुषाले पहिले ब्याटिङ गर्ने निर्णय गर्यो। तर, मोरङको कडा बलिङ अगाडि धनुषा १० ओभर १ बलमै सबै विकेट गुमाएर जम्मा २४ रनमा समेटियो।
धनुषाका कुनै पनि खेलाडीले दोहोरो अंक पार गर्न सकेनन्।
बलिङतर्फ मोरङकी सुपेक्क्षा लिम्बु र कृष्णा लिम्बुले समान २/२ विकेट लिइन् भने बन्दना राजबंशी, समीक राय र फुल कुमारी राजबंशीले १/१ विकेट हात पारे।
जवाफमा मोरङले २ ओभर २ बलमै १ विकेटको क्षतिमा लक्ष्य पुरा गर्दै सहज जित हात पारे । सानू राजबंशीले अविजित १४ रन र टीका साहले अविजित ६ रन बनाइन् । खेलकी ‘प्लेयर अफ द म्याच’ मोरङकी कृतिषा धामी घोषित भइन् ।
दुवै खेलका ‘प्लेयर अफ द म्याच’लाई सप्तरी क्रिकेट संघका उपाध्यक्ष निरज सिंह र पत्रकार चन्दनकुमार यादवले ट्रफी प्रदान गरे ।
सप्तरी क्रिकेट संघको समन्वयमा तथा सबल नेपालको आयोजनामा सञ्चालित उक्त प्रतियोगितामा नेपाल क्रिकेट संघ (क्यान) का केन्द्रीय सदस्य आयुष श्रेष्ठ, खेलकुद पत्रकार मञ्चका अध्यक्ष मनोज माझी, सप्तरी क्रिकेट संघका शम्भु दास र संजय कार्की, सबल नेपालका कार्यक्रम संयोजक नवनित जायवाल, पूर्व राष्ट्रिय खेलाडी राजकुमार प्रधान, धर्मेन्द्र चौधरी, सन्तोष देव, गजेन्द्र माझी लगायतको उपस्थितिमा खेल सम्पन्न भएको थियो ।
भोलि पहिलो खेल धनुषा र सिरहाबीच तथा दोस्रो खेल सप्तरी र मोरङबीच हुनेछ ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |