आन्तरिक राजस्व कार्यालय स्थापनाको माग गर्दै दोस्रो दिन पनि रिले अनशन जारी

राजविराज । राजविराजस्थित करदाता सेवा कार्यालयलाई आन्तरिक राजस्व कार्यालयमा गाभ्ने सरकारी निर्णयविरुद्ध आज दोस्रो दिन पनि रिले अनशन जारी रहेको छ ।

गजेन्द्रचोकमा सुरु भएको दोस्रो दिनको रिले अनशनमा जिल्ला समन्वय समितिका पदाधिकारी, विभिन्न राजनीतिक दलका नेता तथा जनप्रतिनिधिहरूको सहभागिता रहेको छ ।

दोस्रो दिनको रिले अनशनमा जिल्ला समन्वय समितिका प्रमुख शिवनारायण साह, उपप्रमुख शम्भु यादव, जनता समाजवादी पार्टी (जसपा) नेपालका केन्द्रीय सदस्य भीमराज यादव, रुपनी गाउँपालिकाका अध्यक्ष दिनेशकुमार यादव, विष्णुपुर गाउँपालिकाका अध्यक्ष उमेशकुमार यादव, तिरहुत गाउँपालिकाका अध्यक्ष विजयकुमार यादव, शम्भुनाथ नगरपालिकाका निलम्बित नगरप्रमुख जितेन्द्र गुप्तालगायत जनप्रतिनिधिहरू सहभागी रहेको तयारी समितिका मोहन यादवले जानकारी दिएका छन् ।

राजविराजस्थित करदाता सेवा कार्यालयलाई नै स्तरोन्नति गरी आन्तरिक राजस्व कार्यालयको रूपमा स्थापना गर्नुपर्ने एक मात्र मागसहित आन्दोलन सुरु गरिएको संघर्ष समितिका संयोजक मोहन यादवले बताए ।

सरकारले करदाता सेवा कार्यालय गाभ्ने वा खारेज गर्ने निर्णय तत्काल फिर्ता लिनुपर्ने माग गर्दै आन्दोलन भइरहेको जनाउँदै माग पूरा नभएसम्म संघर्ष जारी रहने उनले स्पष्ट पारे ।

राजविराजस्थित करदाता सेवा कार्यालयअन्तर्गत ७२ हजारभन्दा बढी करदाता रहेका छन् भने गत आर्थिक वर्षमा यस कार्यालयमार्फत एक अर्ब रुपैयाँभन्दा बढी राजस्व संकलन गरिएको थियो ।

सरकारले देशभर रहेका ३७ वटा करदाता सेवा कार्यालय खारेज गरी सेवा आन्तरिक राजस्व कार्यालयमार्फत प्रदान गर्ने नीति अघि बढाएको छ ।