सप्तरीको तिलाठीमा द्वितीय विश्व ध्यान दिवस मनाइने

राजविराज । विदेह फाउण्डेशनको आयोजनामा सप्तरीको तिलाठी कोइलाडी गाउँपालिका–१, तिलाठीमा द्वितीय विश्व ध्यान दिवस मनाइने भएको छ ।

आयोजक संस्थाले राजविराजमा आयोजित पत्रकार सम्मेलनमार्फत उक्त जानकारी दिएको हो ।

पत्रकार सम्मेलनमा बोल्दै विदेह फाउण्डेशनका संस्थापक तथा राष्ट्रिय मानव अधिकार आयोगका सदस्य मिहिर ठाकुरले पुस ६ गते तिलाठीस्थित दुखमोचन आश्रममा भव्य कार्यक्रम आयोजना गरी विश्व ध्यान दिवस मनाइने बताए ।

उनका अनुसार विश्वख्यात आचार्य श्री सत्येन्द्र कुमार जीको प्रमुख आतिथ्यमा ध्यान, भजन–कीर्तनलगायत विविध आध्यात्मिक कार्यक्रमहरू सञ्चालन गरिनेछ ।

कार्यक्रमले मानव जीवनमा बढ्दै गएको तनाव न्यूनीकरण गर्न सहयोग पुग्ने र सप्तरी जिल्लालाई अन्तर्राष्ट्रिय स्तरमा चिनाउन मद्दत गर्ने उद्देश्य रहेको ठाकुरले बताए। साथै, स्वर्गीय पिताको स्मृतिमा निर्माण गरिएको आश्रमको प्राङ्गणमा कार्यक्रम आयोजना हुने र सम्पूर्ण तयारी पूरा भइसकेको जानकारी दिए ।

दिवस सफल बनाउन सञ्चारकर्मी तथा आम सप्तरीबासीलाई प्रचार–प्रसारमा सहयोग गर्न उनले आग्रह गरे ।

निवर्तमान प्रतिनिधिसभा सदस्य रन्जु ठाकुरले सीमावर्ती क्षेत्रमा बढ्दो लागूऔषध दुव्र्यसनबाट युवा पुस्तालाई टाढा राख्न यस्ता आध्यात्मिक कार्यक्रम उपयोगी हुने विश्वास व्यक्त गरिन् ।

उनले कुलतमा फसेका युवालाई आध्यात्मिक ज्ञानमार्फत सकारात्मक दिशामा अग्रसर गराउन कार्यक्रमले टेवा पुर्‍याउने बताउँदै, मानव सेवा र स्वास्थ्यका दृष्टिले पनि कार्यक्रम अत्यन्त महत्वपूर्ण भएकाले सबैलाई सहभागिता जनाउन आग्रह गरिन् ।