मिडिया क्षेत्रका चुनौती र समाधानमा सरोकारवालाको जोड

सिरहा । मिडियाको संरक्षण, विज्ञापन नीति, पत्रकारको सुरक्षा, आचारसंहिता तथा सूचनाको हकलाई प्रभावकारी रूपमा कार्यान्वयन गर्नुपर्नेमा सञ्चारकर्मीहरूले जोड दिएका छन् ।

बिहीबार सिरहाको लहानमा मिडिया काउन्सिलद्वारा आयोजित ‘सञ्चार माध्यमको अवस्था र चुनौती’ विषयक एकदिने गोष्ठीमा वक्ताहरूले उक्त आवश्यकता औंल्याएका हुन् ।

कार्यक्रममा मधेश प्रदेश सभा सदस्य जिवछी यादवले लोकतन्त्र स्थापनामा सञ्चारकर्मीहरूको महत्वपूर्ण भूमिका रहेको उल्लेख गर्दै पत्रकारहरूको पेशागत हित, सेवा–सुविधा तथा सुरक्षाका विषयमा प्रदेश सरकार गम्भीर रहेको बताए । उनले पत्रकारिताको विकासका लागि मधेश प्रदेश सभाबाट आवश्यक बजेट उपलब्ध गराउन पहल गर्ने प्रतिबद्धता समेत व्यक्त गरे ।

आम सञ्चार प्राधिकरणका अध्यक्ष जितेन्द्र खडगाले पत्रकारितामा देखिएका विकृति अन्त्य गर्न सबै पक्ष गम्भीर बन्नुपर्नेमा जोड दिए । उनले देशमा परिवर्तन ल्याउन सञ्चारकर्मीहरूको भूमिका महत्वपूर्ण भए पनि सरकार र राजनीतिक दलहरूले पत्रकारको विकास र सुरक्षालाई पर्याप्त रूपमा आत्मसात् नगरेको गुनासो गरे ।

मिडिया काउन्सिलका कार्यवाहक अध्यक्ष सुरेश यादवले पत्रकारिता र पत्रकारलाई मर्यादित बनाउन सबै एकजुट भएर अगाडि बढ्नुपर्ने बताए। पत्रकारको दक्षता, क्षमता विकास र सञ्चार माध्यमको सशक्तीकरणका लागि मिडिया काउन्सिल गठन गरिएको उनले स्पष्ट पारे ।

नेपाल पत्रकार महासंघ सप्तरीका अध्यक्ष श्रवण देवले मिडियालाई जीवन्त राख्न संघ, प्रदेश र स्थानीय तीनै तहका सरकारले गम्भीर भूमिका निर्वाह गर्नुपर्नेमा जोड दिए। विज्ञापनको स्थायी स्रोत नहुँदा पत्रपत्रिकाको आर्थिक अवस्था कमजोर बन्दै गएको उल्लेख गर्दै उनले लोककल्याणकारी विज्ञापनको सुविधा बढाउन माग गरे ।

अध्यक्ष देवले अहिले प्रविधिको दुरुपयोग गर्दै मोबाइल बोकेर जथाभावी पत्रकारको नाममा धम्की दिने, रकम नदिए भिडियो वा फोटो सार्वजनिक गर्ने र आचारसंहिताको पालना नगर्ने व्यक्तिहरू सक्रिय भएको उल्लेख गर्दै त्यस्ता मिडिया र व्यक्तिलाई कारबाहीको दायरामा ल्याउनुपर्ने सुझाव दिए । सरकारी तथा सार्वजनिक सूचना सहज रूपमा उपलब्ध नहुँदा समस्या हुने गरेको गुनासो समेत उनले राखे ।

प्रेस स्वतन्त्रता सेनानी बैधनाथ झाले कुनै दल वा पार्टीमा नलागी निष्पक्ष र स्वतन्त्र रूपमा पत्रकारिता गर्न सञ्चारकर्मीहरूलाई आग्रह गरे । सप्तरीका पूर्व अध्यक्षसमेत रहेका झाले पत्रकारको सीप र क्षमता विकास, सुरक्षा, पेशागत हकको ग्यारेन्टी तथा पत्रकार ऐनको प्रभावकारी कार्यान्वयन आवश्यक रहेको बताए ।

सप्तरीका पूर्व अध्यक्ष धिरेन्द्र प्रसाद साहले मधेश प्रदेश र स्थानीय सरकारले पत्रकारिता क्षेत्रलाई आफ्नै अंगका रूपमा नस्वीकार्दासम्म मधेशको पत्रकारिता विकास सम्भव नहुने जिकिर गरे ।

गोष्ठीमा सञ्चारकर्मी विनय कर्णले पत्रकारितामा नीतिगत सुधार आवश्यक रहेको, योग्यताको आधारमा मापदण्ड बनाएर पत्रकार र सञ्चार माध्यमको वर्गीकरण गर्नुपर्ने तथा पत्रकारलाई लाइसेन्सको व्यवस्था गर्नुपर्नेमा जोड दिए ।

कार्यक्रममा मधेश प्रदेश सरकारअन्तर्गत आम सञ्चार प्राधिकरणका अध्यक्ष जितेन्द्र खडगा, मिडिया काउन्सिल सदस्य रिंकु मिश्र, आम सञ्चार प्राधिकरण सदस्य नवीन गुप्ता, नेपाल पत्रकार महासंघ सिरहा शाखाका अध्यक्ष मनोज बनैता लगायत सिरहा र सप्तरीका दर्जनौं सञ्चारकर्मीहरूको सहभागिता रहेको थियो ।