भारत तस्करी हुँदै गरेको आठ क्युन्टलभन्दा बढी गाँजा सप्तरीमा बरामद

राजविराज । सप्तरीको छिन्नमस्ता गाउँपालिकाबाट ठूलो परिमाणमा लागूऔषध गाँजा बरामद गरिएको छ । आज बुधबार बिहान करिब ३ बजे जिल्ला प्रहरी कार्यालय सप्तरी र इलाका प्रहरी कार्यालय सखडाबाट  खटिएको संयुक्त प्रहरी टोलीले विशेष सूचनाको आधारमा छिन्नमस्ता गाउँपालिका-४, लालापट्टीमा चेकजाँच गर्ने क्रममा गाँजा बरामद गरेको हो ।

नेपालबाट भारततर्फ जाँदै गरेको को १ च ९६६५ नम्बरको पिकअप गाडी चेकजाँच गर्दा गाडीमा ३२ पोका लागूऔषध गाँजा फेला परेको प्रहरीले जनाएको छ । बरामद गाँजाको तौल नापतौल गर्दा प्लास्टिकसहित ८ क्युन्टल ५१ किलो २०० ग्राम रहेको जिल्ला प्रहरी कार्यालय सप्तरी जनाएको छ ।

गाडी चालक सप्तरीको राजविराज नगरपालिका–११ का अन्दाजी २९ वर्षका रामकुमार यादव रहेको पहिचान खुलेको छ । प्रहरीले गाँजासहित पिकअप गाडी र चालकलाई नियन्त्रणमा लिई आवश्यक कानुनी प्रक्रिया अघि बढाएको जनाएको छ।

लागूऔषध कसुर मुद्दामा सप्तरी जिल्ला अदालत, राजविराजबाट ६ दिनको म्याद थप अनुमति लिई जिल्ला प्रहरी कार्यालय सप्तरीबाट थप अनुसन्धान कार्य भइरहेको प्रहरीले जानकारी दिएको छ ।