तिलाठी कोईलाडी गाउँपालिका बालविवाह मुक्त घोषणा

राजविराज । बालविवाह न्यूनीकरण गर्दै समाजलाई स्वस्थ र सुरक्षित बनाउने उद्देश्यका साथ सप्तरीको तिलाठी कोईलाडी गाउँपालिकालाई बुधबार विशेष समारोहका बीच बालविवाह मुक्त गाउँपालिका घोषणा गरिएको छ ।

स्थानीय सरकारको आयोजनामा सम्पन्न कार्यक्रममा जनप्रतिनिधि, सुरक्षाकर्मी, विभिन्न संघ–संस्था, विद्यालय, शिक्षक, अभिभावक तथा समुदायका अगुवाहरूको उल्लेखनीय उपस्थिति रहेको थियो। सो अवसरमा बालविवाह विरुद्धको प्रतिबद्धता सार्वजनिक रूपमा घोषणा गरिएको हो ।

कार्यक्रममा वक्ताहरूले बालअधिकार सुनिश्चित गर्न बालविवाह अन्त्य अपरिहार्य भएको उल्लेख गर्दै यस घोषणाले समाजमा सकारात्मक सन्देश प्रवाह गर्ने विश्वास व्यक्त गरे । उनीहरूले बालबालिकालाई शिक्षातर्फ प्रोत्साहित गर्न, समुदायस्तरमा सचेतना फैलाउन तथा विद्यमान कानुनी व्यवस्था प्रभावकारी रूपमा कार्यान्वयन गर्न सबै पक्ष सहकार्यमा जुट्न आग्रह गरे ।

कार्यक्रममार्फत बालविवाह विरुद्ध सामुदायिक प्रतिबद्धता समेत व्यक्त गरिएको थियो। साथै विद्यालय, अभिभावक, महिला समूह तथा युवा समूहहरूले बालविवाह हुन नदिन सक्रिय भूमिका निर्वाह गर्ने संकल्प व्यक्त गरेका छन् ।

तिलाठी कोईलाडी गाउँपालिकाका अध्यक्ष अरुण कुमार मण्डलको अध्यक्षतामा सम्पन्न कार्यक्रममा प्रेस जनमतका केन्द्रीय अध्यक्ष अबधेश झा, नेपाल पत्रकार महासंघ सप्तरीका सल्लाहकार वैद्यनाथ यादव, सेभ द चिल्ड्रेनका प्रतिनिधि मकर बहादुर सार्की तथा बाल कल्याण अधिकारी शैलेन्द्र सिंहले शुभकामना मन्तव्य व्यक्त गरेका थिए ।

कार्यक्रममा गाउँपालिकाका प्रमुख प्रशासकीय अधिकृत सरोज कुमार कर्णले स्वागत मन्तव्य दिएका थिए भने कार्यक्रम सञ्चालन दीपक कुमार मण्डलले गरेका थिए ।