प्रधानमन्त्री कप जिल्ला छनोटमा शम्भुनाथ विजयी

राजविराज । प्रधानमन्त्री कप पुरुष सिनियर जिल्ला छनोट क्रिकेट प्रतियोगितामा शम्भुनाथले कंकालनीलाई १३ रनले पराजित गर्दै विजयी भएको छ ।

आइतबार राजविराजस्थित पविमावि मैदानमा सम्पन्न खेलमा टस जितेर पहिले ब्याटिङ गरेको शम्भुनाथले निर्धारित ५० ओभरमध्ये ४७ ओभर २ बलमा सबै विकेट गुमाउँदै २६९ रनको योगफल खडा गर्‍यो ।

शम्भुनाथका लागि भोला साहले अर्धशतकीय पारी खेल्दै ७० रन बनाए । त्यसैगरी प्रवेश यादवले ४४ रन, निवेश मण्डलले २८ रन तथा अरबिन्द मण्डलले १७ रनको योगदान दिए ।

बलिङतर्फ कंकालनीका संजीव मण्डलले ४ विकेट लिए भने निरज कुमार महतोले २ विकेट हात पारे । कृष्ण कुमार यादव, मोह सोहिल र गोपाल पैकराले समान १–१ विकेट लिए ।

२७० रनको लक्ष्य पछ्याउने क्रममा कंकालनीले ४२ ओभरमा सबै विकेट गुमाउँदै २५६ रन मात्र बनाउन सक्यो र १३ रनले पराजित भयो ।

कंकालनीका लागि अमित यादवले ८८ रन र महानन्द यादवले ५० रनको अर्धशतकीय पारी खेले पनि टोलीलाई जित दिलाउन सकेनन् । त्यस्तै गोपाल मण्डलले ३९ रन बनाए ।

बलिङतर्फ शम्भुनाथका भोला साह र निरज सुनरैतले ३–३ विकेट लिए भने मोहम्मद तौफिकले २ विकेट लिए । पप्पु यादव र नवीन मण्डलले समान १–१ विकेट हात पारे ।

राष्ट्रिय खेलकुद परिषद् (राखेप) को वार्षिक कार्यक्रमअन्तर्गत नेपाल क्रिकेट संघ (क्यान) को आयोजनामा प्रधानमन्त्री कप एकदिवसीय राष्ट्रिय क्रिकेट प्रतियोगिता अन्तर्गत सप्तरी क्रिकेट संघद्वारा एमसिसी फाउण्डेशन तथा सबल नेपालको सहकार्यमा जिल्ला छनोट प्रतियोगिता सञ्चालन भइरहेको छ ।

सप्तरी क्रिकेट संघका अनुसार प्रतियोगिताअन्तर्गत भोलिको खेल छिन्नमस्ता र राजविराजबीच हुने जानकारी संघका रोशन मण्डलले दिएका छन् ।