चन्दन यादब 
राजविराज । प्रतिनिधिसभा सदस्य पदका उम्मेदवार सूर्यनाथ यादवले सप्तरी निर्वाचन क्षेत्र नम्बर–२ का जनता ठेकेदारमुखी राजनीतिक संस्कृतिबाट आजित भएको बताएका छन् ।
उनका अनुसार विगतका वर्षहरूमा यस क्षेत्रका जनताले विकासका नाममा हुने योजनागत लुट, पहुँचका आधारमा अवसरको बाँडफाँड तथा जनसमस्याप्रति देखाइने संवेदनहीन व्यवहारका कारण गहिरो पीडा भोग्दै आएका छन् । यस अवस्थाले धेरै नागरिकलाई आफ्नै क्षेत्रमा विस्थापितजस्तो अनुभूति गराएको उनले उल्लेख गरे ।
“जनताको हक–अधिकार खोसिँदा पनि बोलिदिने कोही नभएको अनुभूति आज पनि जनमानसमा ताजै छ,” यादवले भने ।
नेपाली कम्युनिस्ट पार्टीका तर्फबाट उम्मेदवार रहेका यादवले जनताको पीडालाई केन्द्रमा राखेर राजनीति अघि बढाउने प्रतिबद्धता व्यक्त गरे । ठेकेदार राजनीतिक प्रवृत्तिले क्षेत्र नम्बर–२ का जनतालाई उठिबासको अवस्थामा पुर्याएको उल्लेख गर्दै उनले अब त्यस अवस्थाबाट जनतालाई पुनः स्थापित गर्न जनतासँगै उभिएर संघर्ष गर्नुपर्ने आवश्यकता औँल्याए ।
“जनतालाई बुझ्नु, जनताको पीडालाई आत्मसात् गर्नु र समाधानको बाटो देखाउनु नै साँचो जनप्रतिनिधिको कर्तव्य हो,” उनले भने ।
यादवले समाज र जनतालाई शोषण गर्ने ठेकेदार प्रवृत्तिलाई बहिष्कार नगरेसम्म वास्तविक परिवर्तन सम्भव नहुने स्पष्ट पारे । शिक्षित, सचेत र सामाजिक न्यायमा आधारित समाज निर्माणका लागि राजनीतिक चेतनाको विकास अपरिहार्य रहेको उनको भनाइ छ ।
जनताको श्रम, पसिना र भविष्य बेचेर राजनीति गर्ने प्रवृत्तिलाई अस्वीकार गर्दै इमानदार, विचारशील र संघर्षशील नेतृत्वलाई अघि ल्याउनु आजको आवश्यकता भएको उनले बताए ।
उनका अनुसार क्षेत्र नम्बर–२ का जनता अब नारा होइन, व्यवहार खोजिरहेका छन् । भाषण होइन, स्पष्ट प्रतिबद्धता चाहिरहेका छन् । जनताको पीडामा साथ दिने, जनताको आवाज संसदसम्म पुर्याउने र शोषणविरुद्ध डटेर उभिन सक्ने नेतृत्वको खोजीमा जनता रहेको यादवले बताए ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |