प्रधानमन्त्री कप सप्तरी छनोट क्रिकेट: डाक्नेश्वरी विजेता

राजविराज । सप्तरी क्रिकेट संघको आयोजनामा सञ्चालन भएको प्रधानमन्त्री कप सप्तरी जिल्लास्तरीय छनोट क्रिकेट प्रतियोगिताको उपाधि डाक्नेश्वरीले जितेको छ । डाक्नेश्वरीले राजदेबीलाई ८९ रनले पराजित गर्दै उपाधिमाथि कब्जा जमाएको हो ।

बिहीबार राजविराजस्थित पविमावि क्रिकेट मैदानमा सम्पन्न फाइनल खेलमा टस जितेर पहिले ब्याटिङ गरेको डाक्नेश्वरीले ३९ ओभर ३ बलमा सबै विकेट गुमाउँदै २०८ रनको योगफल तयार गरेको थियो ।

डाक्नेश्वरीका लागि वसन्त यादवले सर्वाधिक ६० रन बनाए। भिम यादवले ३५ रन, रोबिन सिंहले २३ रन र मोहम्मद सकिब खानले २१ रनको योगदान दिए ।

बलिङतर्फ राजदेबीका निरज यादवले ४ विकेट लिए भने सुशान्त देव र सन्दीप यादवले समान २–२ विकेट लिए । अजय यादव र सफल थापाले १–१ विकेट हात पारे ।

जवाफी ब्याटिङमा राजदेबीले २२ ओभर १ बलमै सबै विकेट गुमाउँदै ११९ रनमा सीमित भयो । राजदेबीका लागि निरज यादवले सर्वाधिक ४१ रन बनाए भने सफल थापाले १५ रन जोडे ।

डाक्नेश्वरीका बलरमध्ये रोबिन सिंह र भिम यादवले समान ३–३ विकेट लिए । शिव दासले २ विकेट लिँदा विजय यादव र सुमित ईसरले १–१ विकेट लिए ।

उक्त अवसरमा सप्तरी क्रिकेट संघको सहयोगमा राजविराज वडा नं. ५ निवासी स्व. अन्नबहादुर आले मगरकी श्रीमती दीपा मगरलाई संघका तर्फबाट नगद १५ हजार रुपैयाँ सहयोग प्रदान गरिएको थियो ।

कार्यक्रममा सप्तरी क्रिकेट संघका उपाध्यक्ष निरज सिंह, सचिव चन्दनकुमार यादव, सदस्य संजय कार्की, रोशन मण्डल तथा क्रिकेट छनोट समितिका सदस्यद्वय धर्मेन्द्र चौधरी र राहुल सिंहलगायतको उपस्थिति रहेको थियो ।

जिल्ला छनोट प्रतियोगिताबाट छानिएका २८ जना खेलाडीलाई माघ १६ र १७ गते दुईदिने बन्द प्रशिक्षणमा राखिने संघले जनाएको छ ।

बन्द प्रशिक्षणपछि माघ २१ गतेदेखि सुरु हुने प्रधानमन्त्री कप राष्ट्रिय क्रिकेट प्रतियोगितामा सहभागिताका लागि मधेश प्रदेशस्तरीय क्रिकेट टुर्नामेन्टमा सप्तरी जिल्ला सिनियर टिम सहभागी हुने सचिव चन्दनकुमार यादवले जानकारी दिए ।