चन्दन यादब 
राजविराज । जनता समाजवादी पार्टी (जसपा) नेपालका अध्यक्ष उपेन्द्र यादवले चुनावका बेला झुठा आश्वासन दिएर मत लिने तर पछि विकास नगर्ने नेतालाई जनताले प्रश्न गर्नुपर्ने बताएका छन् ।
सप्तरीको राजगढ गाउँपालिका–६ फकिरामा मंगलबार आयोजित चुनावी छलफल तथा भेटघाट कार्यक्रममा बोल्दै अध्यक्ष यादवले चुनावका समयमा मीठा भाषण गरेर भोट लिने तर पछि क्षेत्रको विकासप्रति कुनै चासो नदेखाउने पार्टी र नेतालाई चिन्न आमजनतालाई आग्रह गरे। उनले गाउँमा अस्पताल, विद्यालय, रोजगारी, पक्की सडक, सिँचाइ, मल–खादजस्ता आधारभूत आवश्यकता पूरा गर्ने प्रतिबद्धता जनाए पनि काम नगर्नेहरूप्रति सचेत रहनुपर्ने बताए ।
सप्तरी निर्वाचन क्षेत्र नम्बर–३ बाट उम्मेदवारी दिएका यादवले सही र जिम्मेवार नेतृत्व चयन गर्न नसक्दा क्षेत्र र जिल्लाको विकास हुन नसकेको उल्लेख गरे । अधिकार, पहिचान र स्वाभिमानसँगै विकासका लागि संघर्ष गर्न सक्ने नेता छान्न चुक्न नहुने उनले जोड दिए ।
अध्यक्ष यादवले मधेश आन्दोलनकै कारण मधेशी, महिला, दलित, आदिवासी जनजाति, मुस्लिम तथा अल्पसंख्यक समुदायका अधिकार सुनिश्चित भएको उल्लेख गर्दै अब बाँकी अधिकार र समग्र विकासका लागि संघर्ष जारी राख्नुपर्ने बताए । प्राप्त उपलब्धिहरूलाई समाप्त पार्ने षड्यन्त्र भइरहेको दाबी गर्दै उनले यस निर्वाचनमा जसपा नेपाललाई थप मजबुत बनाउन आह्वान गरे ।
बुथ कमिटीका अध्यक्ष हरि यादवको अध्यक्षतामा सम्पन्न कार्यक्रममा जसपा नेपालका केन्द्रीय नेता तथा पूर्वमन्त्री रेणुकुमारी यादव, केन्द्रीय सचिव शैलेन्द्र प्रसाद साह, केन्द्रीय सदस्य बिदेश्वर प्रसाद यादव (बिक्की) लगायतका नेताहरूले मन्तव्य व्यक्त गरेका थिए ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |