पिएम कप: प्रदेशस्तरीय छनोटमा सिरहा विजयी, महोत्तरी ७ विकेटले पराजित

राजविराज । राजविराजमा सुरु भएको प्रधानमन्त्री कप एकदिवसीय प्रदेशस्तरीय क्रिकेट छनोट प्रतियोगिता (पुरुष) अन्तर्गतको उद्घाटन खेलमा सिरहाले सशक्त प्रदर्शन गर्दै महोत्तरीलाई ७ विकेटले पराजित गरेको छ ।

बिहीबार सप्तरी क्रिकेट संघको आयोजनामा राजविराजस्थित पविमावि खेलमैदानमा सम्पन्न खेलमा सिरहाले टस जितेर पहिले बलिङ गर्ने निर्णय गरेको थियो । सिरहाको कडा बलिङ आक्रमणअगाडि महोत्तरीको ब्याटिङ कमजोर सावित भयो ।

पहिले ब्याटिङ गरेको महोत्तरी ३० ओभर ३ बलमै सबै विकेट गुमाउँदै १३४ रनमा सीमित रह्यो। महोत्तरीका लागि रबि कुमार सिंहले सर्वाधिक ४४ रन बनाए भने नवीन कुमार यादवले ३८ रनको योगदान दिए । आदित्य मण्डलले १४ रन र नितेश यादवले ११ रन जोडे । अन्य ब्याटरहरू लामो समय टिक्न नसक्दा टोलीले प्रतिस्पर्धात्मक योगफल बनाउन सकेन ।

सिरहाको बलिङतर्फ अफरूद्विन रायन उत्कृष्ट देखिए । उनले ३ विकेट लिँदै महोत्तरीको मध्यक्रम धराशायी बनाए। त्यस्तै, रूपेश सिंह र प्रदीप पासवानले समान २–२ विकेट लिए भने नुमर अहमदले १ विकेट हात पारे ।

१३५ रनको लक्ष्य पछ्याएको सिरहाले २६ ओभर ५ बलमा ३ विकेट गुमाउँदै लक्ष्य सहजै पूरा गर्‍यो । सिरहाका लागि कृष्णा गुप्ताले ५६ रनको अविजित उत्कृष्ट पारी खेल्दै टोलीलाई जिततर्फ डो¥याए । उनलाई राकेश कामतीले ३२ रन बनाएर राम्रो साथ दिए ।

महोत्तरीको बलिङतर्फ आकाश मण्डलले २ विकेट लिए भने राजिव सदाले १ विकेट लिए पनि टोलीलाई हारबाट जोगाउन सकेनन् ।

खेलमा उत्कृष्ट प्रदर्शन गरेका सिरहाका अफरूद्विन रायन ‘प्लेयर अफ द म्याच’ घोषित भए । उनलाई अन्तर्राष्ट्रिय क्रिकेटर दिपेन्द्र चौधरीले नगद १ हजार ५ सय रुपैयाँसहित कप प्रदान गरे ।

सप्तरी क्रिकेट संघका सचिव चन्दनकुमार यादवका अनुसार प्रतियोगिता अन्तर्गत शुक्रबार धनुषा र महोत्तरीबीच प्रतिस्पर्धा हुनेछ ।

प्रदेशस्तरीय छनोट प्रतियोगिताले स्थानीय खेलाडीलाई राष्ट्रियस्तरमा पहिचान दिलाउने महत्वपूर्ण अवसर प्रदान गर्ने विश्वास आयोजकले व्यक्त गरेका छन् । प्रतियोगिताबाट छनोट हुने खेलाडीहरूले आगामी प्रधानमन्त्री कप राष्ट्रिय क्रिकेट प्रतियोगितामा सहभागिता जनाउनेछन् ।