भूषण सिहं 
राजविराज । उज्यालो नेपाल पार्टीका अध्यक्ष कुलमान धिसिङले देशको समृद्धि, सुशासन, भ्रष्टाचार अन्त्य र विभेदरहित समाज निर्माण पार्टीको मुख्य भिजन रहेको बताएका छन् । शुक्रबार राजविराजमा आयोजित पत्रकार सम्मेलनमा बोल्दै उनले भिजन मात्रै पर्याप्त नहुने र त्यसको प्रभावकारी कार्यान्वयन नै सबैभन्दा महत्वपूर्ण पक्ष भएको स्पष्ट पारे ।
अध्यक्ष धिसिङले वर्गीय, सामाजिक र जातीय विभेद अन्त्य गर्दै नेपालको मौलिक संस्कृति र पहिचान जोगाएर छुट्टै विकास मोडलमार्फत देशलाई समृद्ध बनाउने उज्यालो नेपाल पार्टीको लक्ष्य रहेको बताए । “भाषण, प्रतिबद्धता र घोषणापत्रले मात्र हुँदैन, परिणाम देखिने डेलिभरी आवश्यक छ,” उनले भने, “उज्यालो नेपाल पार्टीको नेतृत्व कार्यान्वयन गर्ने क्षमतामा अब्बल छ ।”
उनले कृषि क्षेत्रमा रासायनिक मलको अभावले किसानलाई ठूलो समस्या भइरहेको उल्लेख गर्दै मल स्वदेशमै उत्पादन गर्नुपर्नेमा जोड दिए । हाइड्रोपावर प्रयोग गरेर पानीबाट हाइड्रोजन उत्पादन गरी अमोनिया र युरिया बनाउन सकिने सम्भावना रहेको बताउँदै उनले नेपालका जलस्रोतलाई खानेपानी, ऊर्जादेखि हाइड्रोजन उत्पादनसम्म प्रयोग गरी समृद्धिको आधार बनाउन सकिने बताए ।
पर्यटन र कृषिलाई रोजगारी सिर्जनाका प्रमुख क्षेत्रको रूपमा उल्लेख गर्दै अध्यक्ष धिसिङले सप्तरी जिल्लाको पहिचान परिवर्तन गर्नुपर्ने आवश्यकता औँल्याए । “सप्तरीमा लगानी गर्न गाह्रो छ भन्ने छवि तोड्नुपर्छ,” उनले भने, “यसलाई पर्यटकीय, कृषि उत्पादनशील र लगानीमैत्री जिल्लाका रूपमा स्थापित गर्नुपर्छ।” यसका लागि सञ्चार माध्यमले सकारात्मक पहिचान निर्माणमा भूमिका खेल्नुपर्ने उनको भनाइ थियो ।
अध्यक्ष धिसिङले राम राजा सिंह स्वास्थ्य विज्ञान प्रतिष्ठानको विषयलाई विशेष प्राथमिकतामा राख्नुपर्ने आवश्यकता औँल्याए । औद्योगिक विकासतर्फ ध्यानाकर्षण गराउँदै उनले सप्तरीको पुरानो गजेन्द्र नारायण सिहं औद्योगिक क्षेत्रलाई व्यवस्थित र आधुनिकीकरण गर्नुपर्ने बताए । पार्टी सरकारमा आएपछि औद्योगिक क्षेत्र तत्काल व्यवस्थापन गरी उद्योग भित्र्याएर स्थानीय युवालाई रोजगारी दिने प्रतिबद्धता उनले व्यक्त गरे ।
शिक्षा क्षेत्रमा तराईका धेरै जिल्लामा सामुदायिक विद्यालयको अवस्था नाजुक रहेको उल्लेख गर्दै अध्यक्ष धिसिङले शैक्षिक गुणस्तर सुधार अत्यावश्यक भएको बताए । कम पास दरले विद्यार्थी विदेश पलायन बढाएको भन्दै उनले सामुदायिक विद्यालयमा राज्यले पर्याप्त लगानी गर्नुपर्ने धारणा राखे । साथै, शिक्षा कलेज तहसम्म निशुल्क र गुणस्तरीय बनाउनुपर्ने उज्यालो नेपाल पार्टीको नीति रहेको बताए ।
स्वास्थ्य क्षेत्रबारे बोल्दै उनले गाउँ–गाउँमा स्वास्थ्य चौकी भए पनि जनशक्ति अभावका कारण सेवा प्रभावकारी नभएको बताए । स्वास्थ्य र शिक्षा दुवै नागरिकले निशुल्क र सर्वसुलभ रूपमा पाउनुपर्ने पार्टीको प्रतिबद्धता रहेको उनले स्पष्ट पारे ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |