सप्तकाेशीका पानीकाे सतह बढेपछि तटबन्ध बस्तीमा हाई अर्लट, डलवा स्थित स्परमा कटान

राजबिराज, १७ साउन ।  सप्तरीमा सप्तकोसी नदीमा पानीको सतह बढेपछि तटबन्ध छेउका बस्तीमा हाई अलर्ट गरिएको छ । पानीको चाप बढेपछि सप्तरीको हनुमाननगर कंकालिनी नगरपालिका १४ डलवा र वडा नम्बर १३ गोबरगाढामा हाई अलर्ट गरिएको छ। सो क्षेत्रमा सुरक्षाकर्मी परिचालन गरी कोसीको पश्चिमी तटबन्धको निगरानी गर्ने कार्य भइरहेको सप्तरी प्रहरी ले जनाएको छ ।

प्रहरी अनुसार बिहान ११ बजे गरिएको मापन अनुसार कोसी ब्यारेज भएर २ लाख १६ हजार ८५ क्युसेक प्रति सेकेन्डका दरले पानीको बहाब भइरहेको छ भने अहिले कोसी बयारेजका ३२ वटा ढोका खोलिएको जनाईएको छ ।

पानीको सतह बढेपछि गोबरगाढामा रहेको विद्यालय नजिक कटान पुगेको छ भने पानी बढेसँगै गोबरगाढाका २० घरमा पानी पसेको हनुमाननगर कंकालिनी नगरपालिका ले जनाएको छ । पानीको सतह बढन थालेपछि हनुमाननगर कंकालिनी नगरपालिकाको वडा नम्बर १४ डलवास्थित स्परमा कटान हुने थालेको वडा अध्यक्ष कृष्णकुमार यादब ले जानकारी दिए ।

अध्यक्ष यादब ले कटान नियन्त्रणका लागि भारतीय कोसी योजनाका ठेकेदारहरू काम सुरु गरे पनि पानीको दवाव अत्यधिक रहेकाले नियन्त्रण गर्न कठिन भईरहेको बताए।