राजविराज नगरपालिकाले स्वतन्त्र पत्रकारितालाई कुण्ठित बनाउने कार्यप्रति महासंघको ध्यानाकर्षण

राजबिराज । नेपाल पत्रकार महासंघ सप्तरीले राजविराज नगरपालिकाद्वारा समाचार संकलनमा लगाएको रोकप्रति गम्भिर ध्यानाकर्षण भएको जनाएको छ । महासंघ सप्तरीका सचिव रामनारायण विश्वासले मंगलबार एक प्रेस विज्ञप्ति जारी गर्दै समाचार संकलनका लागि पत्रकारले नगरपालिकाबाट अनुमतिपत्र लिनुपर्ने कार्यप्रति विरोध जनाएको हो । 

पत्रकार रामनाथ यादवको नाममा माघ २४ गते  नगरपालिकाले उपलब्ध गराएको पत्रमा विद्यालयको समाचार संकलन गर्दा भिडियो नतान्ने र सुधारात्मक समाचार मात्र सम्प्रेषण गर्न भनिएकोप्रति गम्भिर ध्यानाकर्षण भएको महासंघ सप्तरीद्वारा जारी प्रेस विज्ञप्तिमा उल्लेख गरिएको छ । महासंघले नगरपालिकाले समाचार संकलनमा लगाएको रोकले प्रेस स्वतन्त्रता र कानुनी राज्यको ठाडो उल्लंघन गरेको भन्दै गम्भीर आपत्ति व्यक्त गरिएको छ । 

नेपालको संविधान २०७२ ले पूर्ण प्रेस स्वतन्त्रताको सुरक्षा गरेको सर्वविदितै छ, महासंघले जारी गरेको प्रेस विज्ञप्तिमा भनिएको छ, संवैधानिक निकाय प्रेस काउन्सिलले जारी गरेको पत्रकार आचार संहिताले पनि सम्पादकीय स्वतन्त्रताको सम्मान गर्न भनेको छ । उक्त बुँदामा समाचार संकलन, सम्पादन वा उत्पादन, प्रस्तुति तथा सम्प्रेषणसम्बन्धी अन्तिम जिम्मेवारी र अधिकार सम्पादकमा निहित हुनेछ राजविराज नगरपालिकाले पत्रकारलाई समचार संकलनमा अनुमतिपत्र लिनुपर्ने गरेको व्यवस्थाप्रति विज्ञप्तिमा निन्दा व्यक्त गरेको छ । 

शिक्षा शाखा अधिकृत भोगेन्द्र कुमार यादवबाट पत्रकारको नाममा जारी भएको पत्र आफैमा अशोभनीय रहेको भन्दै विज्ञप्तिमा घोर भत्सर्ना गरेको छ ।