दोहाेरो नागरिकता मुद्वा मुल्तबीमा, रूंगटा परिवार सम्पति धमाधम बेच्दै

राजबिराज । दोहोरो नागरिकता सम्बन्धी मुद्दा मुल्तबीमा राख्दै अनुसन्धान जारी रहेकाे अबस्था राजबिराजका रूंगटा परिवार सम्पति बेच्ने कार्य सुरू गरेकाे छ ।

सप्तरीको राजविराज बस्ने राजेन्द्रकुमार रुगंटा, उनकी श्रीमती मंजु रुंगटा, छोराहरु राहुलकुमार रुगंटा र अंकितकुमार रुंगटा तथा छोरी पुजा रुगंटाको दोहोरो नागरिकताकाे अनुसन्धान जारी रहेकाे अबस्थामा आफनाे सम्पति धमाधम बेच्ने कार्य गरेकाे छ ।

दाेहाेराे नागरिकता अनुसन्धानमा गृह मन्त्रालय र जिल्ला प्रशासन कार्यालय सप्तरीले साढे चार वर्षदेखि पत्राचारमा सीमित छन् ।

नेपालस्थित भारतीय दूतावासले कन्सुलर सेवा बिभागलाई २०७६ सालमा पत्राचार गर्दै कन्सुलर सेवा बिभागको चलानी नम्बर एडिएम ७६०३०३७ को मिति २०७६ साल असार ३ गते गृह मन्त्रालयलाई पत्र पठाउँदै पाँचै जनाको दोहोरो नागरिकताका विषयमा अनुसन्धान गरी कारबाहीका लागि आग्रह गरिएको बताईएकाे छ ।

यता मन्त्रालयले कन्सुलर सेवा बिभाग र भारतीय दूतावासको पत्र समेत साथमा राखेर जिल्ला प्रशासन कार्यालय सप्तरीलाई २०७६ साल असार ६ गते पत्राचार गरेको थियो ।

भारतीय दुतावासले पाँचै जनाको नेपाली र भारतीय दोहोरो नागरिकता भएको प्रमाण समेत दिएको छ ।

तर दूतावासबाट प्रमाण सहित कारबाहीका लागि पत्राचार हुँदा समेत नेपाली प्रशासनले रुंगटा परिवारमाथि प्रभावकारी अनुसन्धान गरेको देखिदैन । गृहको निर्देशनपछि जिल्ला प्रशासनले एक पटक रुंगटालाई बोलाएर बयान लिएको थियो ।

प्रशासनले ३ वर्ष भन्दा बढी समय अनुसन्धानका नाममा बिताएर २०७९ साल असार १६ गते गृह मन्त्रालयमा चलानी नम्बर १५०३१ को पत्र पठाउँदै उनीहरुले भारतको नया दिल्लीस्थित थ्री ए रंग रसायन रोहिनी सेक्टरको मतदाता नामावलीमा खोजी गर्दा उनीहरुको नाम नरहेको भन्दै गृहलाई जवाफ फर्काएको थियो ।

जिल्ला प्रसासनले भारतीय दूतावासले दिएको प्रमाण समेतलाई ध्यान नदिई तथा भारतको उनीहरुको भनिएको ठेगानामा पत्राचार समेत नगरी उनीहरुको नाम नदेखिएको जवाफ फर्काएको थियो ।

जिल्ला प्रशासनको यो पत्राचारपछि न त गृह प्रशासनले यो विषयमा ध्यान दिएको छ न त जिल्ला प्रशासन सप्तरीले नै । यो दोहोरो नागरिकता प्रकरणमा अझै अनुसन्धान भइरहेको सप्तरीका प्रमुख जिल्ला अधिकारी किरण थापाले बताउछन ।

जिल्ला प्रसासनले गृह मन्त्रालयलाई लेखेको पत्रको जवाफ नआएको र यो मुद्दाको अनुसन्धान जारी नै रहेकाले थप कागजात सहितका जानकारी अहिले दिन नमिल्ने उनकाे भनाई छ ।

यता दाेहोरो नागरिकता समबन्धी मुद्दामा आरोपी रहेका पाँच जनामध्येका एक अंकितकुमार रुंगटाले आफूहरु दुई देशको नागरिक नरहेको दाबी गरेका छन ।