आज शिवरात्रि भगवान शिवको पुजा गरी मनाइँदै

राजबिराज, ६ फागुन । हिन्दू धर्मावलम्बीको महान् चाड महाशिवरात्रि देशभरका शिवालयहरुमा भगवान् शिवको पूजाआजा गरी मनाइँदैछ । 

यसैगरी राजबिराजको हरिनन्देश्वर महादेव मन्दिरमा पनि भक्तजनहरूको घुँइचो लागेको छ,  त्यसैगरी महादेवा गाउपालिका स्थित महादेव मन्दिरमा पनि भक्तजनहरूको घुँइचो लागेको छ । 

सो अवसरमा हरिनन्देश्वर महादेव मन्दिर संरक्षण समितिले भक्तजनहरूका लाई पुजा गर्न स्वयंसेवक परिचालन गरी  व्यवस्थापन  मिलाएको संरक्षण समिति अध्यक्ष ध्रुव देवले जानकारी दिए । 

उक्त अवसरमा मारवाडी महिला मंच राजबिराज, राजबिराज जेसिस, नरसिंह हिन्दु सेना, विश्व हिन्दु युवा सँघ, नेबि संघ, युनाइटेड डेभलपमेन्ट नेपाल लगायत समाजिक संघसंस्थाहरूले भक्तजनहरूलाई दूध, बेलपत्र, फुल, टीका प्रसाद वितरणको व्यवस्थापन गरेको संरक्षण समितिका सल्लाहकार मागीलाल नाईले जानकारी दिए । 

कालरात्रि, मोहरात्रि, सुखरात्रि र शिवरात्रि नामक चार प्रमुख रात्रिमध्ये एक पवित्र पर्वका रूपमा यसलाई पुराणमा वर्णन गरिएको छ । व्रतमा सर्वोत्तम व्रतका रुपमा लिइने यस पर्वका दिन उपवास गरी ‘ऊँ नमः शिवाय’ मन्त्र जप्ने गरेमा सर्वसिद्ध भई यमलोक जानु नपर्ने धार्मिक विश्वास रहेको छ । 

शिवको अति प्यारो दिनका रूपमा आजको दिनलाई लिने गरिन्छ । शिवरात्रि पर्वलाई पर्वको राजा भनिन्छ र शिवरात्रिको पालनाले भोग र मोक्ष दुवैको प्राप्ति हुने प्राचीन जनविश्वास छ । शिव उत्पत्ति भएको रातका नामबाट नामकरण भएको महाशिवरात्रि प्रत्येक वर्षको फागुन कृष्ण चतुर्दशीका दिन मनाइने प्रचलन छ । 

सप्तरीको राजबिराज, महदेवा सहित देशका विभिन्न शिवालयहरूमा दर्शनार्थीहरूको बिहानैदेखि घुइँचो लागेको छ । यस दिन भक्तजनले शुद्ध भई शिव मन्दिरमा पूजाअर्चना गरी व्रत बस्ने र शिवको प्रिय वस्तु दूध, धतुरो र बेलपत्र चढाउने गर्छन् । 

आज निर्जल व्रत, रात्रि जागरण, चार प्रहरको पूजा, शिवलिङ्गमा दुग्धाभिषेक र शिव महिमा कीर्तन शिवरात्रिको पूजा अर्चनाका मुख्य अङ्ग मानिन्छन् । पशुपतिनाथमा दर्शन गर्न हरेक वर्ष भारत लगायतका देशहरूबाट सयौँको संख्यामा भक्तजनहरू आउने गरेका छन् । 

यता पशुपति क्षेत्र विकास कोषका अनुसार यस वर्षको शिवरात्रिमा कम्तीमा २० लाख भक्तजनले पशुपतिनाथको प्रत्यक्ष दर्शन गर्ने अनुमान गरिएको छ ।