सप्तरीमा मोटरसाइकल दुर्घटना, एक युवकको मृत्यु, एक घाइते

राजविराज, २३ चैत्र । सप्तरीको बोदेवरसाइन नगरपालिका २ बेलहा नजिक विसनपुर स्वर्णपट्टी सडक खण्डमा मोटरसाइकल दुर्घटना हुँदा बोदेवरसाइन नगरपालिका– ५ भाटीनका १७ वर्षीय सागर पण्डितको मृत्यु भएको छ ।

विसनपुरबाट बोदेवरसाइनतर्फ आउँदै गरेको १७ प ९४७५ नम्बरको मोटरसाइकल बोदेवरसाइन-२ वैरियामा अनियन्त्रित भई बिहीबार अपराह्न दुर्घटना हुँदा मोटरसाइकलमा सवार सागर पण्डित र १५ वार्षीय सुमित पण्डित घाइते भएका थिए ।

उनीहरुको उद्दार गरी वरसाइन स्थित जीवनज्योति अस्पतालमा उपचारका लागि लगिएको थियो । उपचारकै क्रममा मोटरसाईकल चालक सागरको मृत्यु भएको र मोटरसाइकल पछाडि सवार १५ वार्षीय सुमित पण्डितको सोही अस्पतालमा उपचार भइरहेको प्रहरीले जनाएको छ ।