सप्तरीमा कार र ट्रकमा मोटरसाइकल ठोक्किँदा छोरीको मृत्यु, बुवा घाइते

राजविराज, २६ चैत्र । सप्तरीमा आइतबार दिउँसो सवारी दुर्घटना हुँदा उदयपुरको त्रियुगा नगरपालिका ९ बगाटोल बस्ने ३६ वर्षीय ध्रुब बस्नेतकी १० वर्षीया छोरी एन्जिलाको मृत्यु भएको छ भने मोटरसाइकल चालक ध्रुब बस्नेत घाइते भएका छन् ।

जिल्ला प्रहरी कार्यालय सप्तरीका अनुसार पूर्व पश्चिम राजमार्ग अन्तर्गत खडक नगरपालिका ७ कल्याणपुरमा पश्चिमबाट पूर्वतर्फ जाँदै गरेको बा.३ च ५२९३ नम्बरको कारमा विपरित दिशातर्फ आउँदै गरेको को. १५ प १९१ नम्बरको मोटरसाइकलले ठक्कर लागि पूर्वबाट पश्चिमतर्फ जाँदै गरेको ना. ६ ख ९८५२ नम्बरको ट्रकको पछाडि ठक्कर लाग्न गई दुर्घट्ना हुँदा बाबु छोरी नै सख्त घाइते भएको थियो र छिन्नमस्ता अस्पताल राजबिराजमा उपचारको क्रममा एन्जिलाको मृत्यु भएको हो ।

दुर्घटनाका सम्बन्धमा आवश्यक अनुसन्धान भइरहेको र कार, ट्रक र तीनका चालक तथा मोटरसाइकललाई नियन्त्रणमा लिएको प्रहरीले जनाएको छ ।