राजविराज स्थित हुलाकी राजमार्गमा आइतबार बिहानै देखी डोजर चल्ने

राजबिराज, २० साउन । राजविराज नगरपालिका वडा नं. ६ र ७ मा पर्ने सिरहा रोडस्थित हुलाकी राजमार्गको दायाँ बाँया ९/९ मिटर जग्गा खाली गराउन आइतबार डोजर चल्ने भएको छ ।   

वडा कार्यालय ६ र ७ तथा राजविराज नगरपालिकाले ७ दिन अघि नै सूचना जारि गर्दै सिरहा रोडको दायाँ बायाँ ९/९ मिटर जग्गामा रहेका भौतिक संरचना हटाउन समय सिमा शनिवार सकेपछि  डोजर लगाएर सडक बिस्तार गर्ने भएको छ।

नगरपालिकाले आइतबार बिहानैबाट डोजर लगाएर मूल सडकको दायाँ बायाँ ९/९ मिटरमा बनाइएको भौतिक संरचना हटाउने तयारी पूरा गरिसकेको जनाएको छ । 

नगरपालिकाले भने आइतबार बिहानैदेखि संरचना हटाउने र कुनै पनि हालतमा पछि नहट्ने जनाएको छ ।

कार्यवाहक नगरप्रमुख इसरत परबिनले पूर्वसूचना अनुसार आइतबार बिहानैदेखि संरचना भत्काउने काम सुरु हुने जानकारी दिइन् ।

हुलाकी सडक निर्माण गर्नका लागि राजविराज नगरपालिकाको वडा ६ र ७, राजरंगशाला र कंचनपुर रोड भएर सिरहा रोड हुने गरि नक्सांकन भइसकेको छ ।