कृषि विश्वविद्यालयमा लगाईएकाे ताला खुल्यो

राजबिराज । मधेश कृषि विश्वविद्यालयमा जनमत पार्टीका कार्यकर्ताहरुले लगाएको ताला बिहीबार बिहान खोलिएको छ ।

जिल्ला समन्वय समितिमा भएको स्थानीय प्रशासनसहितको सर्वदलीय बैठकमा सहमतिपछि जनमतले विश्वविद्यालयमा लगाएको ताला खोलिएको हो ।

कृषि विश्वविद्यालयको शिलान्यास कार्यक्रममा प्रमुख अतिथिसम्बन्धी विवाद भएपछि जनमत पार्टीका कार्यकर्ताहरुले गत माघ ७ गते तालाबन्दी गरेका थिए । माघ ८ गते भएको विश्वविद्यालयको शिलन्यास कार्यक्रममा समन्वयको अभावमा सिर्जित घटनाप्रति सर्वदलीय बैठकले दुख व्यक्त गरेको छ ।

शिलान्यासका सन्दर्भमा विश्वविद्यालयबाट समन्वय गर्न नसकिँदा कमीकमजोरी भएको स्वीकार्दै आगामी दिनमा सबै दल र प्रशासनसँग समन्वय र सहकार्यका साथ अगाडि बढने, विश्वविद्यालयका सन्दर्भमा उठाइएका सवालहरुको एक महिनाभित्र प्रतिवेदन सार्वजनिक गर्ने तथा बिहीबारबाट नै तालाबन्दी खोल्ने सहमति भएको विश्वविद्यालयका रजिष्टार भगवान ठाकुरले जानकारी दिए ।

सहमतिपछि जिल्लामा क्रियाशिल दलका नेता र स्थानीय प्रशासनको टोली विश्वविद्यालयको प्रशासनिक भवनस्थल पुगेर ताला खोलेको छ ।

प्रदेश सरकारले २०७८ साल मंसिर २७ गते सप्तरीको राजविराजमा मधेश कृषि विश्वविद्यालयको स्थापना गरेको थियो ।

कृषि, पशु, माछा र खाद्यप्रबिधि बिज्ञान गरी चार वटा संकायमा पढाई हुने विश्वविद्यालयको भवन निर्माणका लागि राजविराज नगरपालिकाले २६ बिगहा ८ कठा जग्गा राजविराज नगरपालिका १२ मा दिएको थियो ।

सोही जग्गामा शिलान्यासका लागि विश्वविद्यालयले जनता समाजवादी पार्टीका अध्यक्ष उपेन्द्र यादबलाई प्रमुख अतिथि बनाएपछि असन्तुष्ट बनेको जनमत पार्टीले राजविराज नगरपालिका-३ स्थित विश्वविद्यालयको कार्यालयमा तालाबन्दी गरेको थियो ।

शिलान्यास कार्यक्रमका दिन प्रहरी र जनमत पार्टीका कार्यकर्ताहरुबीच झडप समेत भएको थियो ।

सोही प्रकरणमा जनमत पार्टीले मधेश प्रदेश सरकारमा रहेका आफ्ना मन्त्रीहरुलाई फिर्ता बोलाउँदै प्रदेश सरकारलाई दिएको समर्थन समेत फिर्ता लिएको थियो( कान्तिपुर अनलाईनवाट)