राजविराजमा घरको प्लास्टर गर्ने क्रममा पर्खाल ढल्दा एकजनाको मृत्यु

राजविराज । सप्तरीको राजविराजमा  एक मजदुरको मृत्यु भएको छ । राजबिराज नगरपालिका -५ बस्ने राजाराम दासको घरको पर्खाल (वाल) प्लास्टर गर्ने क्रममा पर्खाल झर्दा लेवरमा काम गर्ने सोही नगरपालिकाको वडा नम्बर.-९ मलेठ बस्ने प्रदिप महतोको श्रीमती अन्दाजी ४० की उर्मिला महतोको मृत्यु भएको प्रहरीले जनाएको छ ।

पर्खाल झर्दा घाइते भएकी महतोलाई उपचारका लागि तत्कालै छिन्नमस्ता अस्पताल राजबिराजमा लगिएको भए पनि त्यसको केही समयमा उनको मृत्यु भएको जिल्ला प्रहरी कार्यालय सप्तरीले जनाएको छ ।

यस सम्बन्धमा थप अनुसन्धान भइरहेको जिल्ला प्रहरी कार्यालय सप्तरीका  प्रवक्ता प्रहरी नायव उपरीक्षक ढुण्डीराज न्यौपानेले जानकारी दिए ।