सप्तरीको महुलीमा एक युवक धान खेतमा मृत फेला

राजविराज । सप्तरीको अग्नीसाईर कृष्णासवरन गाउँपालिकामा एक युवक मृत अबस्थामा भेटिएका छन । अग्नीसाईर कृष्णासवरन- ६ मोहनपुर बस्ने रामकाजी पोखरेलको छोरा अन्दाजी वर्ष २८ को इश्वर पोखरेल बुधबार बिहान मृत फेला परेका हुन । 

महुली बजारदेखि ३ सय मिटर पूर्व धान खेतको आलीमा पोखरेललाई मृत भेटिएको इलाका प्रहरी कार्यालय कञ्चनपुरले जनाएको छ । उनको मृत्यु के कति कारणले भएको भन्ने खुलेको छैन । उनको कसैले हत्या गरेको हो की आफ्नै कालगतिले मरेका हुन भनेर अनुसन्धान भइरहेको इलाका प्रहरी कार्यालय कञ्चनपुरले जनाएको छ ।

मंगलबार विश्वकर्मा पूजाको अवसरमा महुली बजारमा साँझ सांस्कृतिक कार्यक्रम आयोजना हुँदा युवाहरू बीच सामान्य झडप समेत भएको स्थानीयले जनाएका छन् । झडपमा पोखरेलको संलग्नता भए-नभएको भन्ने बारे अहिलेसम्म खुल्न नसकेको स्थानीयले बताए ।

स्थानीयका अनुसार मंगलबार साँझ बजार झरेका पोखरेल घर फर्किएका थिएन । वैदेशिक रोजगारीमा गएका पोखरेल दुइसाता अगाडि ५५ बर्षिया आमा  कल्पना पोखरेलको झुन्डिएर मृत्यु भएपछि स्वदेश फर्किएका थिए ।