राजबिराजमा ३८ बर्ष पछि बसपार्क संचालनमा

राजबिराज । वर्षौको प्रतीक्षा पछि राजबिराजमा ३८ वर्ष पछि विधिवत राजबिराज बसपार्क संचालनमा आएको छ । बिहीवार एक समारोह बिच राजबिराज नगरपालिका कावा नगरप्रमुख ईसरत परविनले राजबिराज वडा २ स्थित राजबिराज बसपार्कको रिबन काटेर उद्‍घाटन गरेका छन ।

बसपार्क संचालनमा आएपछि नगरको मुख्य सडकमा देखिएको सवारीहरुको चापसँगै बजारको अस्तव्यस्त अवस्थामा सुधार आउने कावा प्रमुख परविन को भनाई छ । विसं २०४४ मा तत्कालीन प्रधानमन्त्री मरिचमान सिंहले पहिलो पटक, २०४६ मा तत्कालीन अञ्चलाधीश सूर्यबहादुर सेन ओली, २०५२ सालमा तत्कालीन प्रधानमन्त्री शेरबहादुर देउवा र २०७४ सालमा मा सहरी विकास मन्त्रालयका सचिव दीपेन्द्रनाथ शर्मा र राजविराज नगरपालिकाका तत्कालीन प्रमुख शम्भुप्रसाद यादवले संयुक्त रूपमा बसपार्कको शिलान्यास गरेका थिए ।

सहरी विकास मन्त्रालयबाट १६ करोड ३८ लाख ९६ हजार ५१९ रुपियाँमा काम गर्ने ठेक्का पाएको काठमाडौँको कुलेश्वरस्थित सिनर्जी बिल्डर्स प्रालिले बसपार्क निर्माणका लागि २०७४ साल पुस १६ गते सम्झौता गरेको थियो । सघन शहरी तथा भवन निर्माण आयोजना कार्यालय राजबिराजले गत बैशाख २३ गते एक कार्यक्रम राजबिराज नगरपालिका कावा नगरप्रमुख ईसरत परविनलाई राजबिराज बसपार्क हस्तान्तरण गरेका थिए ।

बसपार्कमा सेड, घन्टाघर, भित्री सडक, सर्भिस सेन्टर, शौचालय, टर्मिनल भवन तथा बाउन्ड्री वाल निर्माण गरिएको छ।

उद्‍घाटन सत्रमा नेपाल पत्रकार महासँघ सप्तरी अध्यक्ष श्रवण कुमार देवले संचालन गर्न चुनौती हुँदा हुदाँ पनि ब्यबस्थित पार्किंङ गरी संचालन गर्न सुझाव दिएका छन । जसपा नेपाल सप्तरीका अध्यक्ष केदार यादबले बसपार्क निर्माण गर्न पटकपटक शिलान्यास गरिएपनि हुन सकेको थिएन । तर यस बसपार्क निर्माणले राजबिराज नगरको मुख्य सडकमा देखिएको बेथिती को अन्त हुने विश्वास व्यक्त गरे । 

लोसपा नेपाल सप्तरी अध्यक्ष सुनिल कुमार झाले नियमित बसपार्क संचालन गर्न सबै सरोकारवाला जिम्मेवार हुनुपर्नेमा  जोड दिए । यसैगरी ट्रक व्यवसायी सँघका जगदिश अर्यालले पूर्ण रूपमा संचालनमा ल्याउनु पर्नेमा जोड दिए । नागरिक समाजका अध्यक्ष थानसिंह भन्सालीले संचालन गर्न नगरवासी तथा यातायात पुर्ण संचालन गर्न एकजुट हुनु पर्नेमा बताउँदै अविलम्ब संचालन गर्नुपर्नेमा जोड दिए ।

मैथिली साहित्य परिषद राजबिराजका अध्यक्ष अबधेश झाले धेरै प्रतीक्षा पछि नागरिक सपना पूरा भएकोले ब्यबस्थित तरिकाबाट यातायात का साधन सुचारू गर्न सरोकारवाला निकायलाई आग्रह गरे ।

राजबिराज नगरपालीका वडा २ का वडा अध्यक्ष अरूण कुमार यादबको अध्यक्षतामा आयोजित कार्यक्रममा जिल्ला समन्वय समिति प्रमुख शिव नारायण साह, प्रमुख जिल्ला अधिकारी भोला दहाल, प्रहरी उपरिक्षक ढकेन्द्र खतिवडा, संघन सहरी तथा भवन डिभिजन कार्यालयका प्रमुख सुरेन्द्र कुमार साह लगायतको उपस्थिति रहेको थियो ।

कार्यक्रमको संचालन रबिन्द्र साहले गरेका थिए भने राजबिराज वडा ८ का वडा अध्यक्ष जय नारायण मण्डलले स्वागत मन्तब्य दिएका थिए ।