सप्तरीको धरमपुरमा जङ्गली हात्तीको आक्रमणबाट एक स्थानीयको मृत्यु

कञ्चनरूप । सप्तरी जिल्लाको कञ्चनरूप नगरपालिका–१२ धरमपुरमा जङ्गली हात्तीको आक्रमणबाट एक स्थानीय वृद्धको मृत्यु भएको छ । शनिबार बिहान मकैको खेतमा बसेका ६६ वर्षीय केदार बहादुर विष्ट (दशरथ) लाई हात्तीले आक्रमण गरी ज्यान लिएको हो ।

विष्ट आफ्नो घरदेखि करिब तिन सय मिटर पश्चिमतर्फ रहेको खेतमा मकैको रेखदेखका लागि बसेका थिए । जङ्गली बँदेलले मकै नष्ट गर्ने भएकाले उनी खेतमै रात बिताउँदै आएका थिए । तर शनिबार करिब १ बजेको समयमा हात्तीको समूह खेतमा आएर विष्टमाथि आक्रमण गरेको थियो । स्थानीयका अनुसार हात्तीले पछाडिबाट दाराले उनेर उनको ज्यान लिएको हो ।

स्थानीय बासिन्दाहरूले प्रशासनले हात्ती नियन्त्रणमा कुनै चासो नदेखाएको भन्दै गुनासो गरेका छन् । उनीहरूका अनुसार हाल कञ्चनरूप लगायत जिल्लाका विभिन्न स्थानमा हात्तीहरू दिनमा जङ्गल फर्किए पनि राति बस्तीमा पसेर जनधनमा क्षति पुर्‍याउने गरेका छन् । यसले गर्दा स्थानीयहरू रातभरि जाग्राम बस्न बाध्य छन् ।