राजविराजमा फेरि ढकमक्क जाम : स्थानीय सरकार र ठेकेदारको लापरवाहीले सिर्जिएको जनसास्ती

राजविराज । सप्तरी सदरमुकाम राजविराजमा मङ्गलबार स्थानीय युवाहरूले चक्काजाम गरेका छन् । केही घण्टाको लागि गरिने यी जामहरूले स्थानीय तह, ठेकेदार र प्रशासनको बेवास्ता र गैरजिम्मेवारीपनप्रति जनआक्रोश झल्काउँछन् ।

ठेकेदार कम्पनीले स्थानीय जनआन्दोलन चौक (नेता चौक) देखि राम मन्दिरसम्मको करिब २ सय मिटर सडक विस्तार तथा स्तरोन्नतिको काम आधा अधुरो अवस्थामा अलपत्र परेको छ । केही युवाहरूले पटकपटक यो समस्याविरुद्ध सडकमा उत्रिएर घण्टौंतक जामको रूपमै ध्यानाकर्षण गर्न प्रयास गरे पनि ठोस उपलब्धि देखिएको छैन ।

स्थानीय व्यवसायी, विद्यार्थी र सर्वसाधारण यो समस्याबाट हैरान छन् । एउटा प्रमुख नगरीको मुटुमा यस्तो अवस्था हुनु स्वयं स्थानीय सरकारको असफलताको द्योतक हो । नागरिकले बारम्बार आवाज उठाउँदा पनि सम्बद्ध निकायहरू जिम्मेवारी लिन नचाहनुले समस्यालाई थप दीर्घकालीन बनाइरहेको छ ।

अब प्रश्न उठ्न थालेको छ – यो पटकपटकको चेतावनी र विरोधपछि पनि समाधान किन खोजिँदैन ?  स्थानीय प्रशासन, जनप्रतिनिधि र ठेकेदार मिलेर समस्याको दीर्घकालीन समाधान खोज्न कहिले तयार हुन्छन्  ।