चन्दन यादब 
राजबिराज । राजबिराज नगरपालिका कर्मचारीहरूले आफ्नै कार्यालय प्रमुख र योजना अधिकृतको कार्यशैली प्रति नगरपालिकामा २ घण्टा पेनडाउन गरी धर्ना बसेका छन ।
शुक्रवार राजबिराज नगरपालिका एसोसिएसन इकाई समिति राजविराज नगरपालिकाद्वारा विभिन्न ११ बुँदे माग राख्दै उनीहरू धर्नामा बसेका हो ।
नगरपालिकाको कार्यपालिकाको कानुन सम्मत निर्णय नमान्ने र आफुखुशी स्वेच्छाचारी ढङ्गले काम गर्ने प्रमुख प्रशासकीय अधिकृत डा. श्रवण साह र कर्मचारीको मानसम्मान माथि पटकपटक आघात पु-याउने गरी काम गर्ने योजना शाखाका प्रमुख मनोज कुमार यादवमाथी कारवाही गर्दै सरुवा गर्नु पर्ने प्रमुख माग राखी धर्नामा बसेको कर्मचारी एशोसिएसन अध्यक्ष कल्पना देवले बताइन ।
करार सेवामा कार्यरत इन्जिनियर अशोक कुमार दासलाई कार्यपालिकाको निर्णय विपरित एकलौटी ढङ्गले प्रमुख प्रशासकीय अधिकृत डा. साहले करार सम्झौता भंग गरेको निर्णय फिर्ता लिनु पर्ने माग राख्दै कर्मचारीहरू आन्दोलित भएका छन ।
गत आ.ब.२०८०/०८१ मा वडा कार्यालयमा काम गरे वापत दैनिक ज्यालादारी कर्मचारीको बाँकी रहेको १६ दिनको तलब अविलम्ब भुक्तानी गर्नुपर्ने, कर्मचारीको दुर्घटना बिमाको व्यवस्था तथा निमित्त प्रमुख प्रशासकीय अधिकृत वरिष्ठतम कर्मचारीलाई मात्र दिनु पर्ने लगायतका माग अघि सारिएको छ ।
यस अघि राजबिराज नगरपालिका सहित जिल्ला प्रशासन कार्यालय र नेपाल पत्रकार महासँघमा ११ बुँदे ज्ञापनपत्र मार्फत उक्त मागहरू पुरा नगरिए जेठ २२ गते आन्दोलनका कार्यक्रम अघि बढाउने ज्ञापनपत्र मार्फत चेतावनी दिएका थिए ।
सोही अनुरूप आज शुक्रवार देखी कालो पट्टी बाँधेर काम गर्ने तथा दैनिक २ घण्टा पेन डाउन गरी धर्ना, जेठ २५ गते प्रमुख प्रशासकिय अधिकृतको कार्यकक्षमा तालाबन्दी तथा जेठ २८ गतेदेखि असार १ गते सम्म अतिआवश्यक सेवा बाहेक सबै कामकाज बन्द गरी धर्नामा बस्ने कार्यक्रम घोषणा गरिएको छ ।
त्यसपछि पनि माग सम्बोधन नभए दोश्रो चरणमा आन्दोलनका थप सशक्त कार्यक्रमहरू घोषणा गरिने कर्मचारी इकाई अध्यक्ष कल्पना देवले बताइन ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |