परसाहीमा विद्यार्थी टिकाउन झोला वितरण

राजविराज । सप्तरीको राजविराज नगरपालिका वडा नं. १४ परसाहीका विद्यार्थीलाई विद्यालयमा नियमित उपस्थिति कायम राख्न र शिक्षामा निरन्तरता दिनका लागि झोला वितरण गरिएको छ ।

शनिबार परसाहीको आधारभूत विद्यालयको प्रांगणमा आयोजित झोला वितरण कार्यक्रममा राजविराज नगरपालिकाकी उपप्रमुख ईसरत परविन र वडा नं. १४ का अध्यक्ष जगदीश मण्डलले विद्यार्थीहरूलाई झोला हस्तान्तरण गरे ।

कार्यक्रममा बोल्दै उपप्रमुख परविनले विद्यार्थीलाई विद्यालयमा आकर्षित गर्न र निरन्तर उपस्थित गराउन यो कार्यक्रम आयोजना गरिएको बताइन्। उनले अभिभावकहरूलाई विद्यार्थीको सरसफाइमा ध्यान दिन र नियमित विद्यालय पठाउन आग्रह समेत गरिन् ।

जनचेतना विकास केन्द्रका सुनिल कुमार देवका अनुसार वडा नं. १४ अन्तर्गतको आधारभूत विद्यालय परसाहीका १३२ जना र राधा देवी कैली सिंह परसाही विद्यालयका बालविकासदेखि कक्षा ५ सम्मका ११२ जना गरी कुल २४४ जना विद्यार्थीलाई झोला वितरण गरिएको हो ।

राजविराज नगरपालिकाको सहकार्यमा जनचेतना विकास केन्द्रद्वारा आयोजित सो कार्यक्रममा नगरपालिकाका शाखा अधिकृत कल्पना देव, वडा सचिव चेतनारायण यादव, पोषण सहजकर्ता रञ्जिता कुमारी यादव, विद्यालयका प्रधानाध्यापक राजकुमार मण्डल, पत्रकार चन्दन यादव, नवीन यादवसहित स्थानीय अभिभावकहरूको उपस्थिति रहेको थियो ।