प्रभु बचत तथा ऋण सहकारीको १४औं वार्षिक उत्सव सम्पन्न

राजविराज । राजविराज–४ मा अवस्थित प्रभु बचत तथा ऋण सहकारी संस्था लिमिटेडले शुक्रवार आफ्नो १४औं वार्षिक उत्सव धूमधामका साथ मनाएको छ ।

संस्थाको कार्यालय परिसरमा आयोजित कार्यक्रममा राजविराज नगरपालिकाका कावा नगर प्रमुख ईसरत परविनले केक काट्दै सहकारीको स्थापना दिवसको औपचारिक उद्घाटन गरेकी थिइन् ।

उक्त अवसरमा नगर प्रमुख परविनले सहकारीको निरन्तर प्रगतिको शुभकामना दिँदै जनताको हितका लागि पारदर्शी र विश्वासिलो सेवा प्रवाह गर्न सुझाव दिइन् । उनले पछिल्लो समय केही सहकारीहरूमा देखिएको अनियमितता र ठगीका घटनाहरूले आम जनमानसमा विश्वास घटेको भन्दै सबै सहकारी संघ–संस्थाहरूलाई पारदर्शिता र जवाफदेहिताका साथ अघि बढ्नुपर्नेमा जोड दिइन् ।

वि.सं. २०६८ मा स्थापना भएको यस संस्थामा हाल ४ हजार ५ सय शेयर सदस्य रहेका छन् भने कुल वासलात २१ करोड रुपैयाँ पुगेको जानकारी संस्थाका अध्यक्ष सरफराज अन्सारीले दिए ।

उनका अनुसार संस्था बालबालिका बचत, गृहिणी बचत, जेष्ठ नागरिक बचत, अनिवार्य बचत, रेमिट बचत तथा आवधिक बचतजस्ता कार्यक्रमहरू सञ्चालन गर्दै आइरहेको छ ।

अध्यक्ष अन्सारीको अध्यक्षतामा सम्पन्न वार्षिक समारोहमा राजविराज नगर कार्यपालिका सदस्य सोनी रजक, वडा नं. ४ की वडा सदस्य राजेश्वरी थापा, संस्थाका उपाध्यक्ष नोमान अन्सारी, वरिष्ठ सल्लाहकार सबिर आजम, सञ्चालक समिति सदस्य समीर श्रेष्ठ, लेखा समिति संयोजक समी असगर, ऋण समिति संयोजक मो. समसाद मियाँ, सदस्य कल्पना मिश्र, व्यवस्थापक राजकुमार साह, लेखापाल मुकेश चौधरी, पुजा देव, मन्नु चौधरी, सनोज चौधरी, विरेन्द्र यादव, सम्झना वाग्लेलगायतको उल्लेखनीय उपस्थिति रहेको थियो ।