कृषि विद्युतीकरण सुधारको माग गर्दै जनमत पार्टीको ज्ञापन पत्र

काठमाडौं । जनमत पार्टीले किसानहरूको सुरक्षा र कृषि विद्युतीकरणमा सुधारको लागि नेपाल विद्युत प्राधिकरणसमक्ष पाँचबुँदे माग राखेको छ । करेन्ट लागेर किसानको मृत्यु हुने घटना बढिरहेको भन्दै पार्टीले प्राधिकरणको ध्यानाकर्षण गराएको हो ।

जनमत पार्टीका केन्द्रीय प्रवक्ता डा. शरद सिंह यादवले मंगलबार प्राधिकरणका प्रवन्ध निर्देशक हितेन्द्र देव शाक्यलाई ज्ञापन पत्र बुझाउँदै खेतबारीमा विद्युतीय लाइन खस्दा हुने मृत्यु र क्षतिपूर्ति विषयमा गम्भीरता अपनाउन आग्रह गरेका छन् ।

ज्ञापन पत्रमा कृषिमा विद्युत प्रयोगका लागि छुट्टै मापदण्ड बनाउनुपर्ने, खेतमा पोल वा पोलमा डिस्ट्रीब्युशन बक्सको सुरक्षित व्यवस्था मिलाउनुपर्ने, विद्युतीय कारणले हुने क्षति र मृतकलाई क्षतिपूर्ति दिनुपर्ने, विद्युतीय कृषि बीमा लागू गर्नुपर्ने र कृषि मीटर तथा बिल निशुल्क गर्नुपर्ने माग समावेश गरिएको छ ।

पार्टीले अव्यवस्थित पोल र तारका कारण किसानले ज्यान गुमाइरहेका घटनाप्रति चिन्ता व्यक्त गर्दै यस्ता दुर्घटना रोक्न प्राधिकरणलाई तुरुन्त प्रभावकारी कदम चाल्न आग्रह गरेको छ ।