चन्दन यादब 
राजविराज । गौर घटनामा जनता समाजवादी पार्टी (जसपा) नेपालका अध्यक्ष उपेन्द्र यादवविरुद्ध अनुसन्धान अघि बढाउने सर्वोच्च अदालतको परमादेशविरुद्ध मंगलबार राजबिराजमा विरोध प्रदर्शन भएको छ ।
जसपा नेपाल सप्तरीको अगुवाइमा शिवमन्दिरबाट सुरु भएको विरोध र्याली नगर परिक्रमा गर्दै नेता चौकमा कोणसभामा परिणत भयो ।
कोणसभामा वक्ताहरूले सरकारले राजनीतिक प्रतिशोध साध्न गौर घटनालाई पुनः अगाडि सारेको आरोप लगाए । उनीहरूले भूमि सम्बन्धी विधेयकमा जसपाले समर्थन नगरेको आक्रोशमा अध्यक्ष यादवलाई षड्यन्त्रपूर्वक फसाउने प्रयास भएको टिप्पणी गरे ।
मधेसलाई मरुभूमि बनाउने भूमि विधेयक कदापि स्वीकार्य नहुने चेतावनी दिँदै वक्ताहरूले त्यसलाई आधार बनाई राजनीतिक प्रतिशोध लिने प्रयास भए सशक्त आन्दोलनमा उत्रिने घोषणा गरे ।
सरकारकै इसारामा अध्यक्ष यादवलाई फसाउने षड्यन्त्र गरिएको भन्दै उनीहरूले आक्रोश प्रकट गरे । कोणसभामा जसपा नेपाल सप्तरीका अध्यक्ष केदार प्रसाद यादवको अध्यक्षतामा केन्द्रीय, प्रदेश तथा विभिन्न भातृसंगठनका नेताहरूले सम्बोधन गरेका थिए ।
स्मरणीय छ, सर्वोच्च अदालतले सोमबार रौतहटको गौर घटनामा अध्यक्ष यादवविरुद्ध अनुसन्धान अघि बढाउन परमादेश जारी गरेको थियो । न्यायाधीश तिलप्रसाद श्रेष्ठ र नित्यानन्द पाण्डेयको संयुक्त इजलासले जिल्ला प्रहरी कार्यालय रौतहटलाई सो सम्बन्धमा अनुसन्धान अघि बढाउन आदेश दिएको हो ।
अदालतको आदेश सार्वजनिक भएलगत्तै जसपा नेपालका नेताकार्यकर्ता देशव्यापी आन्दोलनमा उत्रिएका छन् ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |