स्वजातीय एकता र विकृति–कुरिति अन्त्यका लागि देव महासम्मेलन राजबिराजमा

राजविराज । आगामी असोज १७, १८ र १९ गते राजबिराजमा अन्तर्राष्ट्रिय देव महासम्मेलन आयोजना हुने भएको छ । शुक्रवार राजबिराज–६ स्थित बागेश्वरी सेवा समितिको सभाहलमा आयोजित पत्रकार सम्मेलनमार्फत सो जानकारी गराइएको हो ।

पत्रकार सम्मेलनमा बागेश्वरी सेवा समितिका अध्यक्ष तथा महासम्मेलन संयोजक इन्जिनियर इन्द्र नारायण देवले देव समुदायको उद्गम, जातीय पहिचान र इतिहास निर्माणसँगै स्वजाति बीच एकता कायम गर्दै समाजमा रहेका विकृति–कुरिति हटाउने उद्देश्यले सम्मेलन हुन लागेको बताए ।

उनले भने, “मेचीदेखि महाकालीसम्म र भारतमा रहेका देव समुदायको साझा पहिचान र इतिहास निर्माण गर्दै स्वजाति बीच एकता कायम गर्ने उदेश्यले देव समुदायका पाँच संस्थाले संयुक्त रूपमा यस सम्मेलनको आयोजना गर्न लागेका हुन् ।”

संयोजक देवले राज्यले देव समुदायलाई बेवास्ता गरेको गुनासो गर्दै, विभिन्न क्षेत्रमा आफ्नै क्षमता अनुसार योगदान गरे पनि राज्यले ध्यान नदिएको बताए ।

महासम्मेलनका सह–संयोजक इन्द्रकुमार देवले समेत देव समुदायलाई राज्यले उपेक्षा गरेको आरोप लगाउँदै, अल्पसंख्यक जातिका रूपमा सूचीकरण गर्न माग गरे । उनका अनुसार, देव समुदाय अति अल्पसंख्यक आदिवासी भए पनि राज्यले अझैसम्म आधिकारिक मान्यता दिएको छैन ।

पत्रकार सम्मेलनमा संयोजक इन्जिनियर देवले सम्मेलनमा करिब ११ लाख ५५ हजार खर्च हुने अनुमान गरिएको जानकारी दिए ।

महासम्मेलनमा देव समुदायको पहिचान, इतिहास निर्माण, संस्थाहरू बीचको समन्वय, सहकार्य र एकता कायम गर्ने विषयमा छलफल हुने बताइएको छ । त्यस्तै, बहुविवाह, अन्तरजातीय विवाह, समलैंगिक विवाह, दाइजो प्रथा जस्ता सामाजिक विकृति न्युनिकरण, संस्कारगत क्रियाकलापमा समयानुकूल परिमार्जन, तथा अति अल्पसंख्यक देव समुदायलाई आरक्षणको व्यवस्था गर्नुपर्ने विषयमा समेत व्यापक छलफल गरेर घोषणापत्र जारी गर्ने कार्यक्रम रहेको संयोजक देवले जानकारी दिए ।

पत्रकार सम्मेलनमा विराट देव समिति विराटनगरका अध्यक्ष तथा सह–संयोजक राजेन्द्रप्रसाद देव, नेपाल पत्रकार महासंघ शाखा सप्तरीका अध्यक्ष श्रवणकुमार देव, उपाध्यक्ष रामनारायण विश्वास, सुधा देव, बागेश्वरी सेवा समितिका सल्लाहकार डा. कमान्नद देव, समाजसेवी योगेन्द्रप्रसाद देव, वरिष्ठ पत्रकार गणेशलाल देवलगायत सञ्चारकर्मीहरूको उपस्थिति थियो ।