प्रअलाई हाजिर गराई पठनपाठनको वातावरण मिलाइदिन माग

राजविराज । सप्तरीको विष्णुपुर गाउँपालिका–१ स्थित जनता माध्यमिक विद्यालय खुरहुरियाका अभिभावक तथा स्थानीयवासीले विद्यालयमा पठनपाठन नियमित गर्न तथा प्रधानाध्यापकलाई सुरक्षित वातावरण उपलब्ध गराइदिन माग गरेका छन् ।

आइतवार गाउँपालिका अध्यक्ष उमेश प्रसाद यादवलाई ज्ञापनपत्र बुझाउँदै उनीहरूले विद्यालयमा भइरहेको समस्याको छिटो समाधान गरी नियमित शैक्षिक गतिविधि सञ्चालन गर्ने वातावरण बनाइदिन आग्रह गरे ।

उनीहरूले बुझाएको ज्ञापनपत्रमा प्र.अ. अशोक कुमार यादवको नेतृत्वमा तत्काल विद्यालय व्यवस्थापन समिति गठन प्रक्रिया अगाडि बढाउन, सरुवा भई आएका शिक्षकलाई हाजिर गराई पठनपाठनमा खटाउन तथा केही व्यक्तिहरूको धम्की र अपमानजनक व्यवहारका कारण पठनपाठन अवरुद्ध हुन नदिन माग गरिएको छ । माग पूरा नभए सशक्त आन्दोलनमा उत्रिने चेतावनी समेत दिइएको छ ।

गाउँपालिका अध्यक्ष यादवले विद्यालयको विवाद समाधानका लागि आफू गम्भीर रहेको बताउँदै, दुबै पक्षबीच समन्वय गरेर निकास खोजिने जानकारी दिए । उनका अनुसार, “राम्रै प्रअ पठाइएको छ तर कुटपिट, गाली–बेइज्जतीका कारण अहिले पालिकामा हाजिर गर्नुपरेको अवस्था आएको छ,” उनले भने ।

अभिभावक सत्यनारायण यादवले प्रधानाध्यापकलाई विद्यालयमा हाजिर गराई नेतृत्वमा व्यवस्थापन समिति गठन प्रक्रिया अघि बढाउन माग गरे ।

अभिभावक गंगाराम यादवले सरुवा भएका शिक्षकलाई सम्बन्धित विद्यालयमा पठाउन र नयाँ आएका शिक्षकलाई हाजिर गराई शिक्षण वातावरण सुधार गर्न आग्रह गरे ।

त्यसैगरी, केही शिक्षककै कारण शैक्षिक वातावरण बिग्रिएको आरोप लगाउँदै उनीहरूले सिकाइ गतिविधिको निरन्तर अनुगमन गरी गुणस्तरीय शिक्षा सुनिश्चित गर्न जोड दिए ।

प्रधानाध्यापक अशोक कुमार यादवले केही व्यक्तिहरूले विद्यालय वातावरण अस्थिर बनाएको आरोप लगाउँदै धम्की तथा दुर्व्यवहारका कारण आफू असुरक्षित महसुस गरेपछि गाउँपालिकामा हाजिर हुन बाध्य भएको बताए ।