Memo Khabar 
राजविराज । पैसाको लेनदेनसम्बन्धी विवादका कारण राजविराजस्थित सेफ डायग्नोस्टिक ल्याबमा आज विहान तोडफोड भएको छ । ल्याबका सञ्चालक देवैश दत्तका अनुसार उनले सुभास सिंह नामक व्यक्तिसँग विभिन्न चरणमा गरी १० लाख रुपैयाँ ऋण लिएका थिए ।
दत्तले बताइएका विवरणअनुसार उनले दुई वर्षको अवधिमा ब्याजसहित ३१ लाख २९ हजार ५०० रुपैयाँ बैंकमार्फत भुक्तानी गरिसकेका थिए । उनका अनुसार सम्पूर्ण रकम तिरेको प्रमाण माछापुच्छ्रे बैंकको स्टेटमेन्टले पनि पुष्टि गर्छ ।
उनले थपे, “निर्धारित मितिभित्र नै सबै भुक्तानी समाप्त गरिसकेको थिएँ । तर त्यसपछि पनि सुभास सिंह तर्फबाट निरन्तर थप रकमको माग र दबाब आइरहेको थियो । एक महिनाको किस्ता अस्थायी रूपमा दिन नसकिने स्थिति भएको जानकारी गराएपछि उनीहरू समूहमा आएर ल्याबमा तोडफोड गर्न उत्रिए ।”
घटनाका क्रममा ल्याबमा कार्यरत स्टाफसँग गालीगलौज गरिएको, महिलाकर्मीहरू आँसु झार्दै भयभीत बनेको दृश्य देखिएको दत्तले बताए । उनका अनुसार आक्रमणकारीहरूले ल्याबका मूल्यवान मेसिनहरू फालेर नष्ट गरे, जसबाट २० लाख रुपैयाँभन्दा बढीको नोक्सानी भएको अनुमान छ ।
यसबाहेक, ल्याबअगाडि पार्क गरिएको बुलेट मोटरसाइकलसमेत लुटेर लगिएको दत्तले बताए। कानुनी रूपमा सबै रकम तिरेको दाबी गर्दै दत्तले अतिरिक्त दबाब र हिंसात्मक व्यवहारले आफू अन्यायमा परेको गुनासो गरेका छन् ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |