नीति र व्यवहारसँग असन्तुष्टि जनाउँदै जीतेन्द्र नारायण देवले छोडे एमाले

राजबिराज । संविधानसभा सदस्य तथा पूर्वमन्त्री जीतेन्द्र नारायण देवले वैचारिक असहमति र राजनीतिक निराशालाई कारण देखाउँदै नेकपा एमालेसँगको सम्बन्ध अन्त्य गरेका छन् ।

सोमबार राजविराजमा पत्रकार सम्मेलन गर्दै देवले पार्टीको नीति, विचार र व्यवहार क्रमशः जनअपेक्षाबाट टाढिँदै गएको महसुस भएपछि पार्टी परित्याग गर्ने निर्णयमा पुगेको बताए । जिम्मेवार भूमिकामा रहेर पनि देश र जनताको पक्षमा प्रभावकारी भूमिका निर्वाह गर्न नसकिएको आत्मबोधले आफूलाई यो निर्णयमा पुर्‍याएको उनको भनाइ छ ।

देवले देशमा व्याप्त कुशासन, भ्रष्टाचार, बेरोजगारी र युवाहरूको बढ्दो वैदेशिक पलायनप्रति चिन्ता व्यक्त गर्दै यस्ता गम्भीर समस्याप्रति राजनीतिक दलहरू जिम्मेवार र संवेदनशील बन्न नसकेको आरोप लगाए । पार्टीभित्र रहँदा यी विषयमा सार्थक हस्तक्षेप गर्न असफल भएको स्वीकारोक्तिसमेत उनले गरे ।

उनका अनुसार माघ १९ गतेदेखि लागू हुने गरी नेकपा एमालेसँगको सम्पूर्ण जिम्मेवारी र सदस्यता त्याग गरिएको हो । अब आफू कुनै पनि पार्टीगत निर्णय, गतिविधि वा कार्यक्रममा संलग्न नहुने उनले स्पष्ट पारे ।