पत्रकार सुरेश रजकको हत्याको विरोधमा राजविराजमा प्रदर्शन

राजविराज । नेपाल पत्रकार महासंघ, सप्तरी शाखाले समाचार संकलनका क्रममा ज्यान गुमाएका एभिन्युज टेलिभिजनका पत्रकार सुरेश रजकको हत्याको विरोधमा प्रदर्शन गरेको छ । शनिबार नेपाल पत्रकार महासंघ सप्तरीको आयोजनामा पत्रकार रजकको हत्याको विरोधमा राजविराजमा प्रदर्शन गरिएको हो ।

समाचार संकलनकै क्रममा पत्रकारको हत्या भएको र आमसञ्चार माध्यममा आक्रमण गरिएको विरोधमा देशभरका पत्रकारहरू आन्दोलित छन् ।

नेपाल पत्रकार महासंघ सप्तरीका अध्यक्ष श्रवण कुमार देवले पत्रकार रजकको हत्यारालाई पक्राउ गरि अविलम्ब कारबाही गर्न माग गरे ।  पत्रकार रजकको हत्यारा पत्ता लगाई कारबाहीको दायरामा नल्याईएसम्म आन्दोलन जारी राख्ने बताउँदै उनले शान्तिपूर्ण संघर्षको कार्यक्रमबाट सुनुवाइ नभए थप सशक्त आन्दोलनमा उत्रिने चेतावनी दिए ।

महासंघको भवन अगाडिबाट सुरु भएको विरोध र्‍याली राजविराजको मुख्य सडक हुँदै दशन चौक पुगेर सभामा परिणत भएको थियो । पत्रकारले बोकेको प्लेकार्डमा पत्रकार सुरेश रजकको हत्यारालाई कारबाही गर, पत्रकार हत्याको छानबिन गर, प्रेस स्वतन्त्रता जिन्दावाद लगायतको नारा लेखिएको थियो।

शुक्रबार काठमाडौँको तीनकुनेमा भएको राजावादीहरूको प्रदर्शनमा एभिन्युज टेलिभिजनमा कार्यरत पत्रकार सुरेश रजकको मृत्यु भएको थियो ।